Առավոտ. «Կարող են նաև երկնքից աստղեր իջեցնել»
Հայաստանի համայնքների միության նախագահ Էմին Երիցյանը կարծում է, որ մայիսի-14-ին կայանալիք Երևանի ավագանու ընտրությունները մեկ առանձնահատկություն ունեն։
«Դա այն է, որ մի քանի ուժեր պարզապես չմասնակցեցին այս ընտրություններին։ Մնացածը` զարմանալու ոչինչ չկա, մանավանդ, որ Երևան քաղաքում արդեն մի քանի անգամ ընտրություններ եղել են։ Ամփոփելով Երևանի ավագանու ընտրությունների քարոզարշավը` Էմին Երիցյանն ասաց, որ խորհրդարանական ընտրությունների ոճը ներմուծվեց Երևանում։ Նա նկատի ունի, որ քննադատությունը երբեմն անցնում է անձնականի սահմանը։ Անդրադառնալով քարոզարշավում հնչած նախընտրական խոստումներին, ընդհուպ մինչև աշխատատեղեր ստեղծելու մասին հայտարարություններին` բանախոսն ասաց, որ դրանք քաղաքական տրամաբանության մեջ են. «Կարող են նաև խոստանալ երկնքից աստղեր իջեցնել»»,-գրում է թերթը։
Հայոց աշխարհ. «Մեր գրպանից»
Կառավարությունն իր պահուստային ֆոնդից ավելի քան 50 հազար եվրո է հատկացնելու Մարդու իրավունքների Եվրոպական դատարանի «Մուրադյանն ընդդեմ Հայաստանի» գործով վճռի կատարմանը։
«Ժամկետային զինծառայող Սուրեն Մուրադյանը 2002 թվականին Արցախում ծառայության ժամանակ հիվանդացել է, ապա` մահացել։ Եվրոպական դատարանը համարել է, որ խախտվել է զինվորի կյանքի իրավունքը և պարտավորեցրել ՀՀ կառավարությանը 50 հազար եվրո փոխհատուցում վճարել Մուրադյանների ընտանիքին։ Գումարի վճարումը պետք է իրականացվի մինչև մայիսի 24-ը։ Այս վճիռը հնարավոր է դարձել զինծառայողի հոր` Հրաչյա Մուրադյանի` տարիների հետևողական աշխատանքի միջոցով, ինչի շնորհիվ նրա ձեռքբերած անառարկելի ապացույցները հիմք են հանդիսացել նման որոշման համար»,-գրում է թերթը։
Ժամանակ. «Մանուկները` Տարոնին»
Թերթը տեղյակ է, որ Երևանի մանկապարտեզներում այս օրերին կազմակերպվում են «Իմ Երևան» խորագրով հանդեսներ, որոնց ժամանակ հավաքված ծնողներին, երեխաների հարազատներին ու մանկապարտեզի աշխատակազմին քարոզում են քվեարկել Տարոն Մարգարյանի օգտին։
«Երեկ նմանատիպ հանդես-միջոցառում է կազմակերպվել Ավան վարչական շրջանի մանկապարտեզներից մեկում, որի ժամանակ ծնողների ներկայությամբ քարոզչություն են իրականացրել Տարոն Մարգարյանի օգտին։ Նշենք, որ նման հաստատություններում քարոզչությունն արգելված է օրենքով»,-գրում է թերթը։
Ժողովուրդ. «Դրայվ շոու կառավարության նիստում»
Երեկ վարչապետ Կարեն Կարապետյանը կառավարության նիստի ժամանակ հայտարարեց` կառավարության աշխատակազմի ղեկավար-նախարար Դավիթ Հարությունյանն իրեն զեկուցել է, որ տրված հանձնարարականները ճիշտ ժամկետում չեն կատարվում։
«Մեզ հետ զրույցում շատ նախարարներ պնդեցին, որ գոնե իրենք վարչապետի ասածները պարտաճանաչ կատարել են, ու նախատինքը իրենց չի եղել ուղղված։ Իրավիճակը պարզելու համար «Ժողովուրդը» դիմել է կառավարության աշխատակազմի ղեկավար-նախարար Դավիթ Հարությունյանին` նրանից պարզելու, թե ում էին վերաբերում վարչապետի խոսքերը։ «Ընդհանուր մոտեցում է, կոնկրետ որևէ մեկին ուղղված չէ։ Ձևավորված ավանդույթին է ուղղված ավելի»,-պարզաբանեց Հարությունյանը։ Այսպիսով` Կարեն Կարապետյանի երեկվա խոսքերն անհասցե հայտարարությունների շարքից էին` սեփական անձի PR նպատակներով»,-գրում է թերթը։
