ԵՐԵՎԱՆ, 8 մայիսի — Sputnik. Հարավային ռազմական օկրուգի (ՀՌՕ) 102-րդ ռազմակայանի զինծառայողների մասնակցությամբ Հայաստանում անցկացվեց «Գեորգիևյան ժապավեն» ռազմահայրենասիրական ակցիան։ Այս մասին հայտնում է ՀՌՕ մամուլի ծառայությունը։
«Գեորգիևյան ժապավեն» ակցիան առաջին անգամ 2015 թվականին է անցկացվել Հայաստանում տեղակայված ռուսական ռազմակայանում։
«Հայրենական մեծ պատերազմի հաղթանակին նվիրված հանդիսավոր միջոցառման նախապատրաստական աշխատանքների փուլում Գյումրիում և Երևանում անցկացվեց «Գեորգիևյան ժապավեն» ռազմահայրենասիրական ակցիան, որին մասնակցեցին Հայաստանում տեղակայված ՀՌՕ ռուսական ռազմակայանի զինծառայողները», — նշված է հաղորդագրության մեջ։
Ակցիայի շրջանակում հանդիպումներ են եղել վետերանների և զոհված զինվորականների ընտանիքների անդամների հետ, որոնց ընթացքում ռազմաճակատային պատմություններ ու նամակներ են հավաքագրվել։ Հավաքված նամակներն ու պատմությունները իրենց արժանի տեղը կգտնեն Գյումրիում գտնվող զորամասի թանգարանում, որտեղ բացվելու է «Մեր հաղթանակը» ցուցահանդեսը։
«Գեորգիևյան ժապավեն» ակցիան նվիրված է Հայրենական մեծ պատերազմի հաղթանակի օրվա տոնակատարությանը։ Ակցիայի գաղափարը ծնվել է 2005 թվականին ՌԻԱ Նովոստի գործակալությունում, որն այժմ ներառված է «Ռոսիա սեգոդնյա» ՄՏԳ-ի կազմում է։ Այդ ժամանակից ի վեր մայիսի 9-ի նախօրեին ժապավեն կապելն ավանդույթ է դարձել։
Ոչ միայն Ռուսաստանում, այլև արտերկրում միլիոնավոր մարդկանց համար գեորգիևյան ժապավենը դարձել է հիշատակի, սերունդների կապի և զինվորական փառքի խորհրդանիշ։ 2017 թվականին ակցիան կանցկացվի աշխարհի ավելի քան 90 երկրում։
