ԵՐԵՎԱՆ, 5 մայիսի — Sputnik. Մայր Աթոռ Սուրբ Էջմիածինը Գարեգին Բ Ամենայն Հայոց Կաթողիկոսի օրհնությամբ մայիսի 3-ին հնգյակին լույս աշխարհ բերած Կարապետյան ընտանիքին կընծայի 4-սենյականոց բնակարան։ Այս մասին Sputnik Արմենիային տեղեկացրեց Ամենայն Հայոց Կաթողիկոսի մամուլի խոսնակ Վահրամ քահանա Մելիքյանը:
«Հայոց Եկեղեցին միշտ իր ուշադրության կենտրոնում է պահում բազմազավակ ընտանիքների խնդիրները՝ ջանալով հոգևոր խնամքից բացի կարելվույն չափ նաև նյութապես սատարել նրանց։ Տեղեկանալով մեր ժողովրդին հինգ զավակներ պարգևած ընտանիքի բնակության պայմանների մասին՝ Հայոց Հայրապետի կողմից որոշում է կայացվել աջակցություն ցուցաբերել նրան և նպաստել փոքրիկների խաղաղ ու անվրդով մանկությանը»,- ասաց նա:
Նրա խոսքով` Մայր Աթոռի Սոցիալական ծառայությունների գրասենյակի տնօրեն Տ. Մարկոս քահանա Մանգասարյանն այդ առնչությամբ կապի մեջ է Կարապետյան ընտանիքի հետ:
Մայիսի 3-ին Էրեբունի բժշկական կենտրոնում լույս աշխարհ է եկել հնգյակ՝ 4 աղջիկ, 1 տղա։ Հնգյակի ծնողներն ապրում են վարձակալած բնակարանում։
Ավելի վաղ աշխատանքի և սոցիալական հարցերի նախարարի մամուլի քարտուղար Անուշ Դանիելյանը Facebook սոցցանցի իր էջում գրել էր, որ հնգյակից յուրաքանչյուրը կստանա 1.5 մլն դրամ (ավելի քան 3 հազար դոլար)։ Այդպիսով, ընտանիքը կստանա 7.5 մլն դրամ, որից՝ 2,5 մլն դրամը ուղղակիորեն կտրամադրվի ծնողներին, իսկ մնացած 5 մլնը կփոխանցվի յուրաքանչյուր երեխայի անվամբ բացված ընտանեկան դրամագլխի հաշվին, յուրաքանչյուրին՝ 1 մլն դրամ։
