ԵՐԵՎԱՆ, 1 մայիսի — Sputnik. Մայիսյան տոներին Հայաստան այցելած զբոսաշրջիկների մեծամասնությունը ռուսներ են։ Դրան մեծամասամբ նպաստեց վիզային նոր ռեժիմը` այսուհետև ՌԴ քաղաքացիները կարող են Հայաստան այցելել ներքին անձնագրերով։
Ռուսաստանցիներն արդեն կարող են Հայաստան ժամանել ներքին անձնագրերով, Զվարթնոց օդանավակայանում այլևս չեն ստիպում միգրացիոն թերթիկներ լրացնել և սահմանը հատելու նշում չեն կատարում։
«ՄԻՐ» հեռուստաալիքի տվյալներով` Երևանի բոլոր հյուրանոցներն ու հոսթելները ամրագրել էին դեռ երկու ամիս առաջ։ Նշվում է, որ ոմանք գալիս են այստեղ տեսնելու ճարտարապետությունը, ոմանց գերում է բիբլիական Արարատի գեղատեսիլ պատկերը, մյուսներին՝ հայկական խոհանոցը։
«Երևանում մենք այցելեցինք Վերնիսաժ և մթերային շուկա։ Նաև եղանք Ծիծեռնակաբերդում։ Ամեն ինչ մեզ դուր եկավ», — պատմեց զբոսաշրջիկ Անժելա Սարգսյանը։
Զբոսաշրջության ոլորտի մասնագետ Տաթևիկ Մինասյանը նշում է, որ ռուսաստանցի զբոսաշրջիկները, հիմնականում, գալիս են այստեղ մայիսին։ Հայաստանի զբոսաշրջության պետական կոմիտեի տվյալներով` սպասվում է զբոսաշրջային հոսքի ավելացում շուրջ 30%-ով։
Ռուսաստանի տուրօպերատորների ասոցիացիայի ուսումնասիրության համաձայն` Ռուսաստանն ու Վրաստանն առաջատար են այն երկրների ցանկում, որոնց քաղաքացիները նախընտրում են մայիսյան տոներն անցկացնել Հայաստանում: Ըստ նրանց ՝ այդ ուղղություններն այս տարի ավելի մեծ պահանջարկ ունեն, քան նախորդ տարի։
2017 թվականի փետրվարի 23-ից Ռուսաստանի քաղաքացիները կարող են Հայաստան գալ ներքին անձնագրերով։ ՔԱԳՎ-ի տվյալով՝ մեկ ամսվա ընթացքում ներքին անձնագրերով Հայաստան է ժամանել 3091 ռուսաստանցի։
