Երաժշտական լսումներ Գյումրիում

Հայաստանի քառասուն դեսպանները, կամ Գյումրու «Վերածնունդը» թափ է հավաքում

34
(Թարմացված է 15:54 18.04.2017)
Աշխարհի 40 երկրների մի քանի տասնյակ երաժիշտներ կհավաքվեն Հայաստանի կոլորիտային քաղաքներից մեկում` Գյումրիում, մասնակցելու «Վերածնունդ» միջազգային փառատոնին, որի պաշտոնական բացումը տեղի կունենա ապրիլի 19-ին։

ԵՐԵՎԱՆ, 18 ապրիլի — Sputnik. «Վերածնունդ» 9-րդ միջազգային փառատոնի շրջանակներում Հայաստանի հյուսիսային մայրաքաղաք Գյումրի են ժամանել աշխարհի 40 երկրի մի քանի տասնյակ երաժիշտ։

«Նրանք, ովքեր Գյումրի են ժամանում տարբեր երկրներից, տուն են վերադառնում` իրենց հետ տանելով Հայաստանի մի մասնիկը։ Հետագայում այդ աղջիկներն ու տղաները, հանրաճանաչ դառնալով, ակամա Հայաստանի մշակութային դեսպաններ են դառնում»,- լրագրողների հետ զրույցում ասաց ՀՀ մշակույթի նախարար Արմեն Ամիրյանը։

Նրա խոսքով` փառատոնը նաև ապահովում է տնտեսական ազդեցություն, նպաստում է Գյումրիում զբոսաշրջության զարգացմանը։ Այդ կարծիքի է նաև Կոմիտասի անվան պետական կոնսերվատորիայի Գյումրու մասնաճյուղի տնօրեն Կարինե Ավդալյանը։

Գյումրի են ժամանել տարբեր երկրների երաժշտական հաստատությունների ներկայացուցիչներ. երկու պրոռեկտոր Մոսկվայի կոնսերվատորիայից, Գնեսինի անվան երաժշտության ռուսական ակադեմիայի, Աբու Դաբիի և Վիեննայի կոնսերվատորիաների ռեկտորները, և մի շարք այլ հայտնի երաժիշտներ։

Փառատոնի շրջանակներում համաշխարհային հայտնի դաշնակահար Էմիլ Գիլելսի ընտանիքը նվիրեց նրա կիսանդրին, որը Գյումրու կոնսերվատորիայի մասնաճյուղի համար պատրաստել էր քանդակագործ Գրիգորի Պոտոցկին։ Փառատոնը նվիրված է Հայաստանի անկախության հռչակման 25-ամյակին և Գյումրու պետական կոնսերվատորիայի մասնաճյուղի 20-ամյակին։ Փառատոնին իրենց աջակցությունն են ցուցաբերել տարբեր երկրների դեսպանատներ։ Փառատոնի ավարտին կկազմակերպվի «Մշակույթների երկխոսություն» XI միջազգային գիտաժողովը։

«Վերածնունդ» միջազգային IX մրցույթ-փառատոնը անցկացվում է ՀՀ առաջին տիկին Ռիտա Սարգսյանի հովանու ներքո։

Русская версия

34