ԵՐԵՎԱՆ, 23 մարտի — Sputnik. «Իգլա» տեսակի զենիթահրթիռային համալիրի՝ Վրաստանից Հայաստան տեղափոխելու փաստի կապակցությամբ Ազգային անվտանգության ծառայությունում իրականացվում են կասկածյալների մասնակցությամբ քննչական գործողություններ: Այս մասին հայտնում է ՀՀ ԱԱԾ մամուլի ծառայությունը:
«Քննչական գործողությունները կատարվում են` կատարված հանցանքին կասկածյալներից յուրաքանչյուրի մասնակցության բնույթն ու աստիճանը հստակեցնելու և դեպքի մյուս հանգամանքները պարզելու համար»,- նշված է հաղորդագրության մեջ:
ԱԱԾ-ն նաև հայտնում է, որ համատեղ միջոցառումներ են իրականացվում Վրաստանի իրավապահ մարմինների հետ՝ հայտնաբերված ռազմամթերքը հայ-վրացական պետական սահմանով ենթադրաբար անցկացնելու վերաբերյալ ձեռք բերված նախնական տվյալների հավաստիությունը ստուգելու համար:
Նախօրեին ԱԱԾ-ն հայտարարություն էր տարածել, որ մաքսանենգ եղանակով ՀՀ «Իգլա» տեսակի զենիթահրթիռային համալիր տեղափոխելու փաստի առթիվ հարուցված քրեական գործի շրջանակներում ձերբակալվել է 3 անձ, այդ թվում՝ Արցախի պաշտպանության նախկին նախարար Սամվել Բաբայանը։
