«Հերացի» թիվ 1 հիվանդանոցային համալիր

Բժշկական համալսարանի ռեկտորը որևէ մեկին աշխատանքից չի ազատել

27
(Թարմացված է 15:46 21.03.2017)
Այսօր տեղեկություն էր տարածվել, որ Բժշկական համալսարանի ռեկտորը կարգադրել է աշխատանքից հեռացնել ապրիլյան պատերազմի մասնակցի մորը։ Համալսարանի մամուլի ծառայությունը վստահեցնում է` տեղեկությունը չի համապատասխանում իրականությանը։

ԵՐԵՎԱՆ, 21 մարտի — Sputnik. Երևանի պետական բժշկական համալսարանի տարածած հայտարարության համաձայն` այսօր «Հրապարակ» օրաթերթում տեղ գտած տեղեկությունը և համացանցում այդ նյութի տարաբնույթ մեկնաբանությունները, թե իբր ԵՊԲՀ ռեկտորը կարգադրել է հեռացնել աշխատանքից աշխատակցի, իրականությանը չեն համապատասխանում:

««Հերացի» թիվ 1 հիվանդանոցային համալիրում որևէ աշխատակից չի ազատվել աշխատանքից, այլ աշխատանքային պարտականությունները թերի կատարելու համար 3 բուժաշխատողի տրվել է նկատողություն»,- նշված է հայտարարության մեջ:

Համալսարանից հորդորում են չխեղաթյուրել իրականությունը և զերծ մնալ անհարկի շահարկումներից:

«Կարծում ենք՝ ևս մեկ անգամ մանրամասնելու կարիք չկա, թե բժշկական հաստատությունում, մասնավորապես, վիրաբուժական բաժանմունքում ինչպիսի կարևորություն ունի սանիտարահիգիենիկ նորմերի պահպանումը»,- հայտնել են ԵՊԲՀ-ում:

«Հրապարակ» թերթը գրել էր, որ Բժշկական համալսարանի ռեկտոր Արմեն Մուրադյանն այցելել է «Հերացի» թիվ 1 հիվանդանոց շրջայցի, կլինիկայի աշխատակից Աստղիկ Թադեւոսյանի բաժնում՝ համակարգչի վրա ռեկտորը փոշի է նկատել, մատով ցուցադրաբար մաքրել է համակարգչի էկրանը եւ տեղում կարգադրել հեռացնել նրան աշխատանքից:

27