Իրանցի զբոսաշրջիկներ

Երևանն իրանցի զբոսաշրջիկներին կդիմավորի մշակութային և հետաքրքիր ծրագրերով

31
Երևանի քաղաքապետարանի տուրիզմի բաժնի պետ Գևորգ Օրբելյանը ներկայացրել է Երևանում զբոսաշրջության ակտիվացման ուղղությամբ իրականացվող ծրագրերն ու մասնավորապես խոսել իրանցի զբոսաշրջիկների հանգիստը Երևանում առավել հետաքրքիր դարձնելու նպատակով մշակված մշակութային և այլ ծրագրերի մասին:

ԵՐԵՎԱՆ, 20 մարտի — Sputik. Երևանը հյուրընկալ քաղաք է և տարեցտարի զբոսաշրջիկների մեծացող հոսքի մեջ հատկապես տարվա այս ժամանակահատվածում մեծ է հարևան Իրանից Երևան այցելող զբոսաշրջիկների թիվը: Արդեն երկրորդ տարին է` Երևանի քաղաքապետարանը մարտի 20-31-ը՝ Նովրուզի օրերին, մշակում է հատուկ ծրագիր: Ինչպես հայտնում է Երևանի քաղաքապետարանի մամուլի ծառայությունը, այս մասին ասել է Երևանի քաղաքապետարանի տուրիզմի բաժնի պետ Գևորգ Օրբելյանը:

«Մասնավորապես նախքան «Երևան Սիթի-Տուր» քաղաքային զբոսաշրջային երթուղու տարեշրջանի պաշտոնական բացումը, զբոսաշրջային երկհարկանի ավտոբուսներով կկազմակերպվեն գարնանային հատուկ տուրեր պարսկերենով»,- նշել է Գևորգ Օրբելյանը:

Իրանցի և առհասարակ մայրաքաղաք այցելող զբոսաշրջիկների համար Երևան քաղաքի պատմության թանգարանում էլ կբացվի իրանական ժառանգությանը վերաբերող «Մշակույթների երկխոսություն» խորագրով երկրորդ ցուցահանդեսը:

Բացի այդ, Երևանի մուտքը հանդիսացող մի շարք փողոցներում և պողոտաներում՝ այդ թվում Իսակով, Արշակունյաց, տեղադրվել են թեմատիկ վահանակներ՝ «Բարի գալուստ Երևան» բովանդակությամբ:

Երևանի քաղաքապետարանի տուրիզմի բաժնի պետը նաև տեղեկացրել է, որ Հյուսիսային պողոտայում, Ազատության հրապարակում իրանցի զբոսաշրջիկներին երկլեզու՝ անգլերեն և պարսկերեն քարտեզներ են բաժանվելու, որոնք Երևանի հյուրերին կհուշեն մայրաքաղաքի տեսարժան վայրերի գտնվելու և այնտեղ հասնելու տարբերակների մասին:

Իրականացվող միջոցառումները, ինչպես նշել է Գևորգ Օրբելյանը, մեկ անգամ ևս ընդգծում են Երևանի հյուրընկալությունն ու հարմարավետությունը, ինչն արդեն հաջորդ տարի կարող է ապահովել ավելի մեծ թվով զբոսաշրջիկների այցը Երևան:

31