ԵՐԵՎԱՆ, 24 փետրվարի-Sputnik, Գոհար Սարգսյան. Ամեն ինչ սկսվեց այսպես. Ավշարի Արայիկը կամ Արայիկ Գրիգորյանը, որը ռեյտինգային կարգով առաջադրվել է ՀՀԿ ցուցակում, որոշեց շտաբ բացել Արարատի մարզի Մասիս քաղաքում։ Բայց այդ փաստը «դուր չեկավ» Հանարապետականի մեկ այլ թեկնածու Մուրադ Մուրադյանին, ում շտաբը նախորդի հարևանությամբ էր։ Ու սկսվեց ծեծկռտուքը։ Մամուլի տեղեկությունների համաձայն` կա մեկ վիրավոր, որը Գրիգորյանի շտաբի պատասխանատուներից է։
ՀՀ ոստիկանության ԶԼՄ-ների հետ կապի, վերլուծության ու տեղեկատվության բաժնի պետ Էդգար Ջանոյանը Sputnik Արմենիային հայտնեց, որ միջադեպի վերաբերյալ հետաքննություն է ընթանում։
«Այս պահին հավելյալ տեղեկություն հաղորդել չեմ կարող»,-ասաց Ջանոյանը։
Արարատի մարզպետարանում ևս տեղյակ են բախման մանրամասներին, բայց՝ մամուլի միջոցով։ Համենայնդեպս, այդպես է ասում մարզպետարանի հասարակայնության հետ կապերի պատասխանատու Գոհար Խաչատրյանը։
«Իրավիճակին տիրապետելու խնդիր չկա, ամեն ինչ պարզ է, իսկ մնացածը պարզ կլինի։ Մենք տեղեկացրել ենք մարզպետին, նա կորոշի` ինչպես վարվել։ Եթե ինչ-որ բան արվի, մենք կտեղեկացնենք»,- ասաց նա։
Ի դեպ՝ Արայիկ Գրիգորյանը Արարատի մարզպետ Արամայիս Գրիգորյանի եղբայրն է։
Շտաբներում լուրեր են շրջանառվել, որ մի բախմամբ թեման չի վերջանա։
