ԵՐԵՎԱՆ, 2 փետրվարի — Sputnik, Նելլի Դանիելյան. ՀՀԿ ԳՄ այսօրվա նիստի ավարտին ևս խորհրդարանական ընտրությունների թեկնածուների ցուցակները չհրապարակվեցին։
Կուսակցության խոսնակ Էդուարդ Շարմազանովը հայտարարեց.
«Մեր համամասնական և ռեյտինգային ցուցակները լինելու են խիստ ներկայանալի և լավ իմաստով՝ ամբիցիոզ»։
Կուսակցության նախընտրական ծրագիրը ևս դեռ չի հրապարակվում։ Այն, Շարմազանովի խոսքով, ավարտուն տեսք կստանա փետրվարի առաջին տասնօրյակում։
Անդրադառնալով Հովիկ Աբրահամյանի՝ ՀՀԿ-ից դուրս գալուց հետո կուսակցությունից նրա մեձավոր շրջապատի արտահոսքին, Էդուարդ Շարմազանովն այս գործընթացը բնականոն որակեց։
«Դա իրենց ընտրությունն է։ Իրենք են ընտրում իրենց ճանապարհը։ Կուսակցությունից և՛ արտահոսք կա, և՛ ներհոսք»,- ասաց ՀՀԿ խոսնակը։
Ընդ որում, ըստ Շարմազանովի, ներհոսքն ավելի շատ է, քան արտահոսքը։
