Վիգեն Սարգսյան

Երևանը զենքի թեման կշարունակի Ռուսաստանի հետ

43
(Թարմացված է 13:04 27.01.2017)
Ռուսական 200 մլն դոլար վարկի շրջանակում ձեռք բերված սպառազինության մի մասը Հայաստանում է, մյուս մասի վերաբերյալ բանակցությունները կշարունակվեն։ Թեմային անդրադարձել է ՀՀ պաշտպանության նախարար Վիգեն Սարգսյանը։

ԵՐԵՎԱՆ, 27 հունվարի — Sputnik. ՀՀ պաշտպանության նախարար Վիգեն Սարգսյանը լրագրողների հետ հանդիպմանը նշեց, որ ՌԴ-ի հետ շարունակելու են սպառազինության շուրջ երկխոսությունը, բայց քանի որ այն չի լրացնելու ԶՈՒ կարիքները, այլ հնարավորություններ են փնտրում ոչ միայն ռուսական շուկայում:

«Այդ վարկի հետ կապված ցանկը չեմ կարող բացել, մի մասը նախատեսվածի արդեն ՀՀ-ում է՝ մատակարարված է ԶՈՒ-ին և դրված ծառայության: Մնացած պայմանագրերն ընթանում են ըստ ժամանակացույցի, և մենք հետամուտ ենք լինելու հնարավորինս արագ ստանալ անհրաժեշտ ծավալները»,-հավելեց Վիգեն Սարգսյանը:

Նա ընդգծեց, որ սպառազինությունների հարցը նուրբ թեմա է, «չենք կարող միանգամից ամեն ինչ ի ցույց դնել»։

«Կարող եմ միայն ասել, որ մի մասն արդեն փոխանցվել է Հայաստանի ԶՈՒ-երին։ Մնացածը կատարվում է գրաֆիկի համապատասխան, ու մենք հետամուտ ենք, որ շուտ ստանանք այդ սպառազինումը, որը էլ ավելի կբարձրացնի մեր բանակի մարտունակությունը»,- նշեց նախարարը։

Երևանը հայ-ռուսական պայմանագրի շրջանակում 200 մլն դոլար վարկ է վերցրել զենք գնելու համար։ 2015 թվականին ստորագրված համաձայնագրով նախատեսվում է ռուսական արտադրության սպառազինություն գնել։ Համաձայնագիրը ստորագրվել է 2015 թվականի հունիսի 25-ին, ուժի մեջ է մտել 2016 թվականի փետրվարի 10-ին։

Русская версия

43