Լաուրա Սարգսյան, Sputnik.
Չէին հասցրել հանդարտվել կրքերը ռուսական «Իսկանդեր» օպերատիվ-մարտավարական հրթիռային համալիրների շուրջ՝ վրացական հանրությանն անհանգստացրեց նոր լուր. ԶԼՄ-ներում շրջանառվում է Գյումրիում` 102-րդ ռուսական ռազմակայանում, «Նեբո-Մ» ռադիոլոկացիոն համալիրը տեղակայելու թեման։
Եթե որոշ վրացի փորձագետներ հոռետեսորեն են վերաբերվել «Իսկանդեր» ձեռք բերելուն, ապա «Նեբո-Մ» համալիրի տեղակայման մասին լուրերը շատերը լիովին իրական են համարում։ Նրանց կարծիքով` Հայաստանը, լինելով ՀԱՊԿ անդամ երկիր, «Իսկանդերների» կարիք չունի, չէ՞ որ ագրեսիայի դեպքում դաշնակիցները կպաշտպանեն Հայաստանը, իսկ «Նեբո-Մ»-ը տեղադրվելու է Վրաստանի, Թուրքիայի, Իրաքի, Իրանի և Ադրբեջանի օդային տարածքը հսկելու համար։
«Այդ գերժամանակակից ռադիոլոկացիոն համալիրները թույլ կտան ռուս զինծառայողներին՝ հսկողության տակ պահել Վրաստանի, Թուրքիայի, Իրաքի, Իրանի և Ադրբեջանի օդային տարածքը»,- ասվում է nsp.ge տեղեկատվական-կրթական պորտալում հրապարակված հոդվածում։
Ռուս փորձագետները ևս չեն կասկածում, որ «Նեբո-Մ» ռադիոլոկացիոն համալիրը թույլ կտա Ռուսաստանին՝ վերահսկել Վրաստանի, Ադրբեջանի և Թուրքիայի օդային տարածքը, սակայն Իրաքի և Իրանի տարածքում ազդեցությունը մասնակի կլինի։
Պաշտոնական Մոսկվան իբր անհանգստացած է Թուրքիայում ԱՄՆ-ի ռազմաօդային ուժերի բազայի ակտիվությամբ, ինչպես նաև Վրաստանի կողմից աճող սպառնալիքով, մասնավորապես, Վազիանիում ՆԱՏՕ-ի ռազմաբազայի տեղակայման մասին խոսակցություններով։
Նշենք, որ Վրաստանում 2015թ-ի օգոստոսից գործում է Վրաստանի և ՆԱՏՕ-ի համատեղ ուսումնական կենտրոն (Joint Training and Evaluation Center — JTEC), որը տեղակայված է «Կրցանիսի» Ազգային ուսումնական կենտրոնի տարածքում և մասամբ ընդգրկում է Վազիանիի ռազմաբազան։
Չնայած դրան` վրացի փորձագետները ենթադրում են, որ Վրաստանի կողմից ագրեսիայի սպառնալիք չկա։ Արևմուտքի գերակայությունները կտրուկ փոխվել են ԱՄՆ-ի նախագահի պաշտոնում Դոնալդ Թրամփի ընտրությունից հետո։ Դա նշանակում է ՆԱՏՕ-ի և ԱՄՆ-ի հետ Վրաստանի՝ երկրի տարածքում հրթիռային համալիրների և ռազմաբազաների տեղակայման վերաբերյալ բանակցությունների սառեցում։
«Ռադիոլոկացիոն հսկողության ռուսական համալիրները եղել են Հայաստանում «Նեբո-Մ»-ի ենթադրվող տեղակայումից առաջ, քանի որ դրանց առկայությունը ռուսական ՀՕՊ միջոցների գտնվելու վայրերում լիովին բնական է»,- ՌԻԱ Նովոստիի հետ զրույցում ասել է Աշխարհագրական խնդիրների ակադեմիայի նախագահ Կոնստանտին Սիվկովը։
Ռուս փորձագետները նշում են, որ Գյումրիում «Նեբո-Մ»-ի տեղակայումը սպառնալիք չի հանդիսանա համալիրի գործողության շառավղում հայտնված երկրների համար, և դրանում արտառոց ոչինչ չկա։ Ամենուրեք, որտեղ ծավալվել են ՀՕՊ համակարգերը, պետք է լինեն միջոցներ, որոնք ապահովում են ռադիոլոկացիոն հսկողություն։
Սակայն, այսօրվա դրությամբ, «Նեբո-Մ» ռադիոլոկացիոն կայանների տեղակայման մասին հարցը բաց է մնում։ Պաշտոնական Երևանը դեռ լռում է։
Русская версия
