Ընտրություններ

Ընտրական բարեփոխումների գնահատականը

20
(Թարմացված է 18:56 14.01.2017)
ԵԱՀԿ ժողովրդավարական հաստատությունների ու մարդու իրավունքների հարցերով գրասենյակը Հայաստանում ընտրական բարեփոխումների վերաբերյալ հայտարարություն է տարածել:

ԵՐԵՎԱՆ, 14 հունվարի — Sputnik. Ապրիլին 2-ին Հայաստանում կայանալիք Ազգային ժողովի ընտրություններին ընդառաջ ԵԱՀԿ ժողովրդավարական հաստատությունների ու մարդու իրավունքների հարցերի գրասենյակը (ԵԱՀԿ/ԺՀՄԻԳ) հրապարակել է ԵԱՀԿ/ԺՀՄԻԳ կարիքների գնահատման առաքելության (ԿԳԱ) զեկույցը, որում, ըստ տարբեր բաժինների, առանձնացված են մի շարք դրական կողմեր և առաջընթաց, որը վերաբերում է ընտրական գործընթացի նոր բարեփոխումներին:

Զեկույցում կարևորվում է, որ ընտրական բարեփոխումն իրականացվել է լայնամասշտաբ հանրային քննարկումների և լայնածավալ քաղաքական աջակցության պայմաններում:

«ԵԱՀԿ/ԺՀՄԻԳ ԿԳԱ շատ զրուցակիցներ մեծապես ողջունել են օրենսդրական փոփոխությունները՝ քաղաքական ուժերի միջև հանրային քննարկումներն ու համագործակցության մթնոլորտը համարելով դրական քայլ՝ ուղղված նախքան ընտրությունները հանրային վստահության մթնոլորտ ձևավորելուն»,- ասվում է զեկույցում:

Կա նաև գնահատական գործընթացի վերաբերյալ և ըստ այդմ` «բարեփոխման գործընթացը եղել է բաց և համապարփակ, և փոփոխությունները հավանության են արժանացել իշխող և ընդդիմադիր պատգամավորների ճնշող մեծամասնության կողմից»։

Զեկույցը նշում է, որ նոր օրենսգրքում հաշվի են առնվել ԵԱՀԿ/ԺՀՄԻԳ-ի կողմից նախկինում ներկայացված մի շարք առաջարկություններ, այդ թվում՝ այն առաջարկությունները, որոնք վերաբերում էին ընտրողների ցուցակներին և նույնականացմանը, կանանց՝ որպես թեկնածուների ներկայացվածությանը, բողոքներին և դիմումներին, ինչպես նաև քարոզչությանը և նախընտրական քարոզչության ֆինանսավորմանը։

Արձանագրվում է նաև, որ 2016 թվականին ԵԱՀԿ/ԺՀՄԻԳ-ը և Վենետիկի հանձնաժողովը հրապարակել են Ընտրական օրենսգրքի նախագծի վերաբերյալ երկու համատեղ եզրակացություն՝ գալով այն եզրահանգման, որ նախկինում կատարած առաջարկությունների մեծ մասը հաշվի է առնվել:

Նոր օրենսգրքով նախատեսվում է ընտրողների նույնականացման կատարելագործված համակարգ, ընտրողների ստորագրված ցուցակների հրապարակում, ընտրական մարմինների անկախությունը խթանող միջոցներ, դիտորդների համար պարտադիր ստուգարքի վերացում և թեկնածուների ցուցակում կանանց քվոտաների բարձրացում: Փոփոխություններով նաեւ հստակեցվում են նախընտրական քարոզարշավին, նախընտրական քարոզարշավի ֆինանսավորմանը, թեկնածուների գրանցմանը և բողոքներին ու դիմումներին վերաբերող առանցքային դրույթները:

Զեկույցում նշվում է նաև, որ տեղական դիտորդների համար պարտադիր վերապատրաստման դասընթացներ կազմակերպելու և ստուգարք անցկացնելու մասին դրույթը հանվել է՝ արձագանքելով ԵԱՀԿ/ԺՀՄԻԳ նախկին առաջարկություններին:

ԵԱՀԿ/ԺՀՄԻԳ կարիքների գնահատման առաքելության զեկույցը առաջընթաց է համարվում և նշվում, որ ընտրական վեճերը լուծելու համար սահմանված նոր ժամկետները ողջամիտ են:

Русская версия

20