ԵՐԵՎԱՆ, 29 դեկտեմբերի — Sputnik. Այսօր հայ-ադրբեջանական սահմանին իրականացված դիվերսիոն գործողության ողջ պատասխանատվությունը կրում է Ադրբեջանի ռազմաքաղաքական ղեկավարությունը, ՀՀԿ ԳՄ նիստի ավարտին հայտարարել է ՀՀԿ խոսնակ Էդուարդ Շարմազանովը:
«Հայաստանը համոզված է, որ միջազգային հանրությունը պետք է խիստագույնս դատապարտի Ադրբեջանի սադրիչ գործողությունները և ակնկալում է շատ խիստ գնահատականներ նաև ԵԱՀԿ ՄԽ համանախագահների կողմից, որովհետև, ի վերջո, Ադրբեջանն այդպես է պատասխանում Սանկտ- Պետերբուրգի և Վիեննայի գագաթնաժողովներում ընդունված սկզբունքներին ու պայմանավրվածություններին»,- ասաց Շարմազանովը` հավելելով, որ ԵԱՀԿ ՄԽ համանախագահների արձագանքը` համապատասխան հայտարարության տեսքով, պետք է լինի առնվազն ՀԱՊԿ գլխավոր քարտուղարի հայտարարությանը համապատասխան խստությամբ ու հասցեականությամբ:
«Ժամանակն է իրերը կոչել իրենց անուններով»,- ասաց ՀՀԿ խոսնակը:
ՀՀԿ նիստում անդրադարձ է եղել նաև ՀԱՊԿ գլխավոր քարտուղար Նիկոլայ Բորդյուժայի` Ադրբեջանի սադրիչ քաղաքականությունը դատապարտող հայտարարությանը, այն գնահատելով իբրև դրական, քանի որ օպերատիվ և հասցեական է, դրանում Ադրբեջանի գործողությունները որակվում են իբրև սադրանք:
«Խոսելով ԼՂ մասին՝ Բորդյուժան գործածել է ԼՂ հանրապետություն արտահայտությունը: Չեմ կարծում, թե դա վրիպակ է, որովհետև ՀԱՊԿ-ի նման լուրջ կազմակերպույունն իր կայքում վրիպակներ թույլ չի տալիս, այն էլ՝ ԳՔ-ի անունից: Դա շատ խիստ դիվանագիտական բառապաշարով արված հայտարարություն էր և պտժիչ քարտ էր Ադրբեջանին. դեղին թե կարմիր՝ ցույց կտա ժամանակը»,- ասաց Շարմազանովը:
Էդուարդ Շարմազանովը հայտնեց նաև, որ ՀՀ տարածքում գտնվող Ադրբեջանցի գրոհայինի դին Ադրբեջանի կատարած սադրիչ գործողությունների անհերքելի ապացույցն է, որը չի կարող անտեսվել միջազգային կառույցների, հատկապես՝ ԵԱՀԿ ՄԽ-ի կողմից:
