«Հայկական ժամանակ». Սերժ Սարգսյանն ուզում է փոխել տեղակալներին
Թերթը փաստում է, որ երեկ ՀՀԿ ԳՄ նիստ տեղի չի ունեցել, հակառակ ամեն հինգշաբթի նիստ գումարելու ձևավորված ավանդույթի:
«Չի հրավիրել, քանի որ այս պահին դրա անհրաժեշտությունը չի առաջացել, վաղը եթե առաջանա, կհրավիրենք: Հաջորդ շաբաթ կունենանք»,- թերթի փոխանցմամբ ասել է ՀՀԿ կազմակերպչական հանձնաժողովի նախագահ Ռուբիկ Թադևոսյանը:
«Սպասվում էր, որ այս շաբաթ ՀՀԿ-ն պետք է հստակեցներ իր նախագահի տեղակալների թեկնածուների անունները, այնուհետև խորհրդի նիստում հաստատեր: Հայտնի է, որ առանձնացվել է առաջին տեղակալի պոստը, որի համար առաջադրվելու է վարչապետ Կարեն Կարապետյանի թեկնածությունը: Ներկայումս ՀՀԿ փոխնախագահներն են Արմեն Աշոտյանը, Գալուստ Սահակյանը, Մուշեղ Լալայանը, Հովիկ Աբրահամյանը և Ռազմիկ Զոհրաբյանը»,-գրում է «Հայկական ժամանակը»:
Թերթը չի բացառում, որ Սերժ Սարգսյանը ցանկանում է իր տեղակալների կազմում մեծ փոփոխություն անել, բայց դա դեռ չի հստակեցրել, այդ պատճառով էլ այս շաբաթ ԳՄ նիստ չի հրավիրել:
«Ժամանակ». Արթուր Բաղդասարյանն ընդդիմադիր կմնա
Թերթի դիտարկմամբ` «Հայկական Վերածնունդ» կուսակցությունը նոր ձևավորվելիք ԱԺ-ում իր ներկայությունն է հաշվարկում։ «Արթուր Բաղդասարյանը հասկանում է, որ Սերժ Սարգսյանի ծրագրում է ԲՀԿ-ի և ՀՅԴ-ի միջոցով «ազգային համաձայնության կառավարություն» ձևավորել»,- գրում է թերթը։
«Ստեղծված պայմաններում Արթուր Բաղդասարյանը չի բացառում, որ կարող է մաս կազմել կառավարությանը, բայց Սերժ Սարգսյանը այդ գաղափարին դեմ է, քանի որ այդ դեպքում ԱԺ կանցնեն անվերահսկելի ընդդիմադիր ուժեր, իսկ նոր Սահմանադրությամբ՝ առնվազն 1/3-ը պետք է ընդդիմությունը ներկայացված լինի։ Սերժ Սարգսյանը ծրագրում է, որ ամենամեծ ընդդիմադիր խմբակցությունը նոր ԱԺ-ում պետք է գլխավորի «Հայկական Վերածնունդ»-ը՝ Արթուր Բաղդասարյանի գլխավորությամբ»,- գրում է «Ժամանակը»:
«Իրատես». Հեռանալիս չեն մոռանում
«Իրատես» թերթն անդրադարձել է պաշտոնից հեռացող չինովնիկների վերջին քայլերին: Ըստ թերթի, «յուրաքանչյուր չինովնիկ պաշտոնավարման ավարտին փորձում է տակից փախչող աթոռից քաղել առավելագույնը»: Օրինակ, ՊԵԿ նախկին նախագահ Հովհաննես Հովսեփյանը պաշտոնավարման վերջին օրը մի քանի տասնյակ հրամանագրեր է ստորագրել ՊԵԿ համակարգի տարբեր «յուղոտ» պաշտոններում նոր մարդկանց նշանակելու մասին: ՊԵԿ նոր նախագահն էլ զբաղված է նրանցից ազատվելով: Իսկ նախկին վարչապետ Հովիկ Աբրահամյանը մինչ հեռանալը հասցրել է սեփականաշնորհել հանքավայրեր, որոնցից մեկը Վայոց ձորում գտնվող ոսկու հանք է:
«Հրապարակ». Հարկային փոխատեղումներ
Թերթը գրում է, որ «Պետեկամուտների կոմիտեում կադրային փոփոխությունները հասել են տարածքային տեսչություններին: Վարդան Հարությունյանը «ռակիրովկաներ» է անում՝ կանխելով ղեկավարների սերտաճումը բիզնեսի հետ:
Օրինակ՝ Վանաձորցի, բայց տասնյակ տարիներ «գեներալների հետ քյալլա տվող» Արմավիրի հարկայինի պետ Արթուր Եթիմյանին տեղափոխել է Իջևան, Վանաձորի հարկային տեսչության երևանցի պետ Կարեն Այվազյանին՝ Գյումրի, Գյումրիի հարկային տեսչության պետ Դավիթ Ղալումյանին տեղափոխել է Կապան, Կապանի պետ ԱԺ ՀՀԿ-ական պատգամավոր Վարդան Այվազյանի եղբորորդի Արթուր Այվազյանին՝ Երևան՝ Ավտոտրանսպորտային միջոցների մաքսային ձևակերպումների մաքսատան պետի տեղակալ, իսկ Հովիկ Աբրահամյանի փեսայի եղբորը՝ Վարդան Մամիկոնյանին էլ Արտաշատից տեղափոխել է Աշտարակ:
«Հրապարակ». Աղանդը «Աշտարակ կաթի» կործանման պատճառ
Թերթի տեղեկություններով` «Աշտարակ կաթի» ձախորդությունների պատճառն այն է, որ ընկերության սեփականատերն անդամակցել է աղանդավորական շարժման, որտեղ վերջինիս ուղեղը, թերթի բնորոշմամբ, «լվացել են»: Վկայակոչելով կազմակերպության առողջացման ծրագրի ղեկավար Արտակ Ավագյանին, թերթը նշում է, որ «Աշտարակ կաթը» գնել ցանկացող «Ադռա Ռեմառա» ընկերությունն ԱՄՆ-ում գործող համաշխարհային կազմակերպություն է, որի սեփականատերերն են Արա և Արտակ Ասատրյանները:
Նյութի ռուսերեն տարբերակը
