ԵՐԵՎԱՆ, 5 դեկտեմբերի — Sputnik. Հայտնի երաժիշտ, «System of a down» խմբի մեներգիչը Հայաստան կժամանի 2017 թվականին և որպես դիտորդ կմասնակցի գալիք խորհրդարանական ընտրություններին։ Այս մասին Թանկյանը հայտնել է մամուլի ասուլիսի ժամանակ։
Բացի խորհրդարանական ընտրություններին վերաբերող հարցերի քննարկումից, Թանկյանն անդրադարձել է նաև շատերի համար ցավոտ մեկ այլ խնդրի` Հայաստան-սփյուռք հարաբերություններին։
«Սփյուռքի հիմնական խնդիրն է` ինչպես անել, որ երիտասարդությունն իրեն Հայաստանից կտրված չզգա։ Իսկ Հայաստանի ժողովուրդը պետք է դադարի սփյուռքին արհամարհանքով վերաբերվել։ Եկեք մեզ մոտ, բայց դադարեք քննարկել մեր կենսակերպը։ Ժամանակն է վերջ տալ դրան», — նշեց Սերժ Թանկյանը։
Բացի Սերժ Թանկյանից, քննարկմանը մասնակցել են նաև կանադացի հայտնի ռեժիսոր Ատոմ Էգոյանն ու նրա կինը` դերասանուհի Արսինե Խանջյանը։ Նրանց ջանքերի շնորհիվ ընթացիկ տարվա սեպտեմբերին մեկնարկել է «Արդարություն Հայաստանում» ստորագրահավաքը, որն ըստ Թանկյանի` մեծապես կնպաստի խորհրդարանական արդար ընտրությունների անցկացմանը:
