ԵՐԵՎԱՆ, 24 նոյեմբերի-Sputnik. Կրթության և գիտության նախարար Լևոն Մկրտչյանն այսօր հրավիրված էր Ռուսաստանի հայերի միության նախագահ Արա Աբրահամյանի կազմակերպած միջոցառմանը` նվիրված ռուսաց լեզվին։ Նախարարը խոստովանեց. մտածել է` գնալ, թե չգնալ, քանի որ գիտի` դրանից հետո սկսելու են ավելի շատ տարածվել անհարկի խոսակցություննները։
Նախարարը հերթական անգամ շեշտեց, որ Հայաստանի պետական լեզուն հայերենն է։ Բայց եթե ուզում ենք ունենալ գիտակրթական պոտենցիալ ունեցող տարածք, մեր երկրի քաղաքացիները, մայրենի լեզվի փայլուն տիրապետումից զատ, պետք է ունենան օտար լեզուների իմացություն։
«Եվրոպական երկրներում ռեալ 3 լեզվի իամցություն կա։ Մենք գնում ենք առնվազն երկու լեզվի խորացման ուղղությամբ՝ մայրենիից զատ։ Ռուսաց լեզվին կարգավիճակ տալու հարց գոյություն չունի։ Կարևորը, որ ֆիզիկայի ֆակուլտետում սովորի և իր տեխնիկական գրականությունը կարողանա մեկ այլ օտար լեզվով կարդալ»,-ասաց նախարարը։
Պաշտոնական մասից դուրս նա հայտնեց իր անձնական կարծիքը` անհանգստացած է, որ Հայաստանում հետ է մղվել գերմաներեն, ֆրանսերեն սովորելու մշակույթը։ Նախարարը պատմեց, որ ինքը, օրինակ, սովորել է անգլիական թեքում ունեցող դպրոցում։ Հիմնական կուրսից բացի, եղել են դասընթացներ անգլերենով։ Դա, ըստ նախարարի, օգնել է լեզուն ավելի լավ հասկանալ։
Նախարարն ընդգծեց` մենք գտնվում ենք ԵՏՄ գործակցության, ռազմատեխնիկական համագործակցության դաշտում, և ռուսերենը եվրասիական տարածաշրջանի միջպետական հաղորդակցման լեզու է։
