«Բարեկամության կամուրջ»

«Բարեկամության կամուրջ». ո՞վ կլինի շինարարը

19
(Թարմացված է 15:25 07.11.2016)
Հայ–վրացական «Բարեկամության կամրջի» շինարարությունը կմեկնարկի 2017 թվականի գարնանը։ Ներկա պահին ամփոփվում են կամրջի շինարարության մրցույթի երկրորդ փուլի արդյունքները։

ԵՐԵՎԱՆ, 7 նոյեմբերի — Sputnik, Լաուրա Սարգսյան. Տարածաշրջանում աննախադեպ շինության` «Բարեկամության կամրջի» շինարարությունը կմեկնարկի 2017 թվականի գարնանը։ Այս պահին լուծվում են կազմակերպչական աշխատանքները և ամփոփվում ամռանը հայտարարված մրցույթի երկրորդ փուլի արդյունքները։

Մրցույթի երկրորդ փուլում նախապատրաստվում են նախագծի տեխնիկական փաստաթղթերը։

«Մրցույթի երկրորդ փուլն ավարտին է մոտենում։ Մենք երկրորդ փուլ անցած մասնակիցներին ժամանակ տվեցինք, որպեսզի նրանք ֆինանսական և տեխնիկական հայտեր ներկայացնեն», — Sputnik Արմենիայի թղթակցի հետ զրույցում ասաց «Հյուսիս-հարավ» պետական կազմակերպության տնօրեն Արթուր Սարգսյանը։

Կամրջի կառուցման մրցույթի առաջին փուլը բաղկացած էր միայն տեխնիկական առաջարկից: Առաջին փուլի առաջարկները գնահատելուց հետո պատվիրատուն պարզաբանման հանդիպման է հրավիրել մրցույթի որակավորման չափանիշները բավարարող և տեխնիկապես համապատասխան հայտ ներկայացրած մասնակցին: Միայն որակավորված մասնակիցները, որոնք առաջին փուլում ներկայացրել են տեխնիկապես համապատասխան և ընդունելի հայտ, հրավիրվել են մասնակցելու երկրորդ փուլին։

ՀՀ նախագահն ու Վրաստանի վարչապետը մասնակցել են Բագրատաշենի սահմանային անցման կետի բացման արարողությանը
ՀՀ նախագահի մամուլի ծառայություն

Մրցույթի հարցերով զբաղվող հանձնաժողովի կազմում չորսական մարդ է ներգրավված Վրաստանից և Հայաստանից։

«Մրցույթի երկրորդ փուլի արդյունքներով մենք ընտրում ենք լավագույնին և հուսով ենք, որ նա նաև լավ շինարար կլինի և կարդարացնի մեր սպասումները», — ասաց Սարգսյանը։

Նրա խոսքով` եթե ամեն ինչ շարունակվի ըստ նախատեսվածի, ապա կամրջի կառուցումը կմեկնարկի 2017 թվականի գարնանը։ Այդ հարցը ևս մեկ անգամ բարձրացվել է Հայաստանի նախագահ Սերժ Սարգսյանի և Վրաստանի վարչապետ Գեորգի Կվիրիկաշվիլու հետ հանդիպման ժամանակ։

«Երկու երկրի բարձրաստիճան պաշտոնյաների հանդիպումը բացառապես բարիդրացիական բնույթ էր կրում։ Այս հանդիպման շրջանակում ամփոփվել է կատարված աշխատանքը», — եզրափակեց Սարգսյանը։

Նա նշեց, որ վրացական կողմը դրական է տրամադրված և ոգևորված է այնքան, որքան հայկական կողմը։

Կամրջի շինարարության ծրագրի պաշտոնական մեկնարկը տրվեց 2013 թվականին, իսկ վրացական կողմի ու Վերակառուցման և զարգացման եվրոպական բանկի հետ բանակցությունները շարունակվեցին մինչև 2014 թվականը։

«Բարեկամության կամրջի» կառուցման հարցը վերջնական լուծում ստացավ Հայաստանի նախագահ Սերժ Սարգսյանի, այնուհետև նաև ՀՀ վարչապետ Հովիկ Աբրահամյանի` Թբիլիսի կատարած այցելություններից հետո։ Երկու կողմերը համաձայնության եկան և տարածաշրջանում բացառիկ այս կառույցն անվանեցին «Բարեկամության կամուրջ»։

Կամրջի կառուցման, նախագծման և շինարարության արժեքը մոտ 9 միլիոն եվրո է, որի կեսը ֆինանսավորելու է վրացական կողմը: Ծրագիրը իրականացվելու է Վերակառուցման և զարգացման եվրոպական բանկի (ՎԶԵԲ) վարկային միջոցներով:

19