ԵՐԵՎԱՆ, 7 նոյեմբերի — Sputnik. Քաղաքացիական ավիացիայի գլխավոր վարչությունն ավարտել է բանակցությունները ռուսական «Պոբեդա» ավիաընկերության հետ։ Այս մասին Sputnik Արմենիային հայտնեց Քաղավիացիայի գլխավոր վարչության մամուլի քարտուղար Սաթենիկ Հովհաննիսյանը։
Ավելի վաղ ՔԱԳՎ-ն հայտնել է, որ «Պոբեդան կսկսի թռիչքներ իրականացնել դեպի Գյումրի, ընդ որում` տոմսը կարժենա 20 դոլար։
««Պոբեդա» ավիաընկերության հետ բանակցություններն ավարտվել են, հիմա տեխնիկական մասն ենք ապահովում, կատարվում է թռիչքների հետ կապված փաստաթղթերի վերջնականացում», — ասաց Հովհաննիսյանը։
Ավելի վաղ տեղեկություն էր տարածվել, որ ավիաընկերությունը մտադիր է հրաժարվել Երևանի ուղղությամբ թռիչքներից, քանի որ «Զվարթնոց» օդանավակայանի սպասարկման ծառայությունները թանկ են։
«Աերոֆլոտ» խմբին պատկանող «Պոբեդա» ավիաընկերությունը ստեղծվել է 2014 թվականի սեպտեմբերի 16-ին «Դոբրոլյոտ» փոխադրողի փոխարեն, որը նույն տարվա աշնանը դադարեցրել է թռիչքները Եվրամիության պատժամիջոցների ցուցակում հայտնվելուց հետո: «Պոբեդան» գործում է Մոսկվայի «Վնուկովո» օդանավակայանում։ 2015 թվականի արդյունքներով` ավիաընկերությունը սպասարկել է 3.09 մլն ուղևոր: Ռոսավիացիայի տվյալների համաձայն` փոխադրողն այս ցուցանիշով ՌԴ քաղավիացիայում 7-րդ տեղն է զբաղեցրել:
