ԵՐԵՎԱՆ, 4 նոյեմբերի — Sputnik. Նելլի Դանիելյան. «Սեքյուրիթի դրիմ», «Փարկինգ Սիթի Սերվիս» ՍՊԸ-ները և «Լոկատոր» ՓԲԸ-ն առաջիկայում կարող են զրկվել ավտոճանապարհներին տեղադրված տեսախցիկների, արագաչափերի և ավտոկանգառների համար գանձվող գումարից:
Թե ինչ փոփոխություններ կկատարվեն առաջիկայում և ինչ հնարավոր վնասներ կկրեն վերոհիշյալ մասնավոր ընկերությունները, պարզ կդառնա առավելագույնը 2-3 շաբաթից, երբ կկատարվեն ՀՀ նախագահի և վարչապետի՝ համապատասխան կառույցներին տրված հանձնարարականները:
Մինչ այդ Sputnik Արմենիան փորձեց ճշտել, թե այդ հանձնարարականներն ինչպես են ընդունում իրենք՝ մասնավոր ընկերությունները: Պարզվեց, որ նրանք այնքան էլ հակված չեն խոսելու իրենց անմիջականորեն առնչվող այս թեմայի մասին:
«Փարկինգ սիթի սերվիս» ընկերության տնօրենը նախ տեղում չէր, ապա պարզվեց, որ ընդհանրապես Հայաստանում էլ չէ, իսկ մեր հարցերին ընկերությունում որևէ մեկն իրավասու չէր պատասխանել:
«Սեքյուրիթի դրիմ» ՍՊԸ տնօրենը թեև Հայաստանում էր, նրա հետ ևս մեզ չհաջողվեց խոսել. Ալեքսան Զաքարյանը կամ զբաղված էր, կամ արդեն դուրս էր եկել գրասենյակից:
Միակը, որի հետ մեզ հաջողվեց խոսել, «Լոկատոր» ՓԲԸ-ի տնօրեն Արմեն Խաչատրյանն էր: Նա, սակայն, նախ հայտարարեց, որ ՀՀ նախագահի և վարչապետի հանձնարարականները մեկնաբանել չի ցանկանում, ապա նշեց, որ բոլոր հարցերին կպատասխանի առաջիկայում, ամենայն հավանականությամբ, հրավիրվելիք մամուլի ասուլիսում: Որոշ հարցերի նա, այդուամենայնիվ, պատասխանեց:
Մեր հարցին, թե որքանով է իրականությանը համապատասխանում պաշտոնյաների երեկվա այն հայտարարությունը, թե «Փարկինգ սիթի սերվիսն» ու «Լոկատորը» տիրապետում են վճարովի ավտոկանգառներից հավաքած գումարի 70 տոկոսին, Արմեն Խաչատրյանը պատասխանեց. «Մենք շատ փոքր մասնիկ ենք կազմում այդ ամենում» և խորհուրդ տվեց դիմել իր գործընկեր «Փարկինգ սիթի սերվիսին» ՝ չթաքցնելով, որ հենց նա է այդ բիզնեսի հիմնական խաղացողը:
Հիշեցնենք` Երևանի վճարովի ավտոկայանատեղերի կազմակերպումը Երևանի քաղաքապետարանի հետ կնքած պայմանագրով հատկացվել է «Փարկինգ սիթի սերվիս» ՍՊԸ-ին և «Լոկատոր» ՓԲԸ-ին: Ըստ եռակողմ պայմանագրի, հավաքագրված գումարի 70 տոկոսը հատկացվում է մասնավոր ընկերություններին, իսկ քաղաքային բյուջե փոխանցվում է միայն 30 տոկոսը:
Նշենք նաև, որ արդարադատության նախարարության իրավաբանական անձանց պետական ռեգիստրի տվյալներով, «Լոկատոր» ՓԲԸ-ն գրանցվել է 2007թ. ապրիլի 16-ին, «Փարկինգ սիթի սերվիս» ՓԲԸ-ն՝ 2012թ-ի սեպտեմբերի 27-ին:
Այս ընկերությունը պարտավորվել է Երևանի փողոցները զինել տեսանկարահանող սարքավորումներով, ճանապարհային նշաններով և համապատասխան սպիտակ ու կարմիր գծանշումներով: Երրորդ ընկերությունը, որը կարող է կորցնել իր եկամուտները՝ «Սեքյուրիթի Դրիմ»-ը, գրանցվել է 2004թ.-ի նոյեմբերի 10-ին: ՀՀ Ոստիկանության հետ կնքած պայմանագրով ընկերությունը պարտավորվել է 2011-2017թ.թ.-ի ընթացքում 9 մլն 849 հազար 562 եվրոյի ներդրում իրականացնել:
Այդ գումարով ընկերությունը պետք է Հայաստանի ավտոճանապարհներին արագաչափեր ու տեսախցիկներ տեղադրեր և տեխնիկապես սպասարկեր ու բարելավեր վիճակը: Ընկերության սեփականատերը պետռեգիստրի տվյալներով Գուրգեն Զաքարյանն է, որն իր եղբոր՝ Ալեքսան Զաքարյանի հետ նաև անվտանգության համակարգեր ներկրող «Էլլիպս» ընկերության համասեփականատերն է:
Ինչպես երեկ կառավարության նիստից հետո լրագրողներին հայտնել էր ՀՀ ֆինանսների նախարար Վարդան Արամյանը, այս ընկերությունը ևս տնօրինում է ամբողջ գումարի 70 տոկոսը: Մնացած 30 տոկոսը ևս անվերահսկելի կարգավիճակում էր, քանի որ փոխանցվում էր ոստիկանության բյուջե:
Թե որքանով ՀՀ քաղաքացիների վճարած տույժերն ու տուգանքներն առաջիկայում կսկսեն ծառայել նույն այդ քաղաքացիների կարիքները հոգալուն, պարզ կդառնա այն ժամանակ, երբ պատկան կառույցները կողմնորոշվեն՝ ի՞նչ փոփոխություններ են իրականացնելու այս համակարգում:
