«Պոբեդայի» ինքնաթիռը

«Պոբեդա» ավիաընկերությունը պատրաստվում է հրաժարվել երևանյան չվերթերից

66
(Թարմացված է 13:08 03.11.2016)
«Պոբեդան» երևանյան չվերթերից կհրաժարվի «Զվարթնոց» միջազգային օդանավակայանի սպասարկման գնի պատճառով։

ԵՐԵՎԱՆ, 3 նոյեմբերի — Sputnik. «Աերոֆլոտ» խմբում ընդգրկված «Պոբեդա» ավիաընկերությունը պատրաստվում է հրաժարվել Երևանի ուղղությամբ նախատեսված չվերթերից։ Այս մասին ՌԻԱ Նովոստիին են հայտնել ընկերությունից։

«Օդանավակայանի սպասարկման բարձր գնի պատճառով մենք որոշել ենք հրաժարվել Երևանի ուղղությամբ թռիչքներ իրականացնելուց։ «Զվարթնոցում» 1 անձի սպասարկման գինը 50 եվրո է, այսինքն ավելի շատ, քան մեր սակագինն է», — հայտնել է աղբյուրը։

Նա նշել է, որ «Պոբեդայի» արտասահմանյան երթուղային ցանցի` օդանավակայանի սպասարկման սակագինը կազմում է 10 եվրո` 1 անձի համար, որոշ օդանավակայաններում նույնիսկ անվճար է։

Ավելի վաղ «Պոբեդան» Դոնի Ռոստովից դեպի Երևան չվերթեր իրականացնելու թույլտվություն էր ստացել։

Նոյեմբերի վերջին «Պոբեդան» կսկսի չվերթեր իրականացնել Գյումրի քաղաքից դեպի Մոսկվա։

«Աերոֆլոտ» խմբին պատկանող «Պոբեդա» ավիաընկերությունը ստեղծվել է 2014 թվականի սեպտեմբերի 16-ին «Դոբրոլյոտ» փոխադրողի փոխարեն, որը նույն տարվա աշնանը դադարեցրել է թռիչքները Եվրամիության պատժամիջոցների ցուցակում հայտնվելուց հետո: «Պոբեդան» գործում է Մոսկվայի «Վնուկովո» օդանավակայանում։ 2015 թվականի արդյունքներով` ավիաընկերությունը սպասարկել է 3.09 մլն ուղևոր: Ռոսավիացիայի տվյալների համաձայն` փոխադրողն այս ցուցանիշով ՌԴ քաղավիացիայում 7-րդ տեղն է զբաղեցրել:

66