Էռնեստ աբելյան

Փաստաբան. Լրագրողն աշխատանքից հեռացվել է Աշխատանքային օրենսգրքի խախտմամբ

396
(Թարմացված է 11:29 24.10.2016)
Հայաստանում ճանաչված հեռուստալրագրող Նունե Սիմոնյանն արդեն շուրջ 8 ամիս գործազուրկ է: Ավելին`ընտանիքի ապրուստը հոգալո և կենցաղային խնդիրները լուծելու համար նա ամիսներ առաջ ստիպված էր արտագաղթել ԱՄՆ:

ԵՐԵՎԱՆ, 22 հոկտեմբերի — Sputnik. Աշխատանքային պայմանագիրը լուծելու մասին «Ար» հեռուստաընկերության տնօրինության որոշումը բողոքարկելու և հարկադիր պարապուրդի դիմաց փոխհատուցման պահանջով լրագրող Նունե Սիմոնյանը դիմել էր Շենգավիթ վարչական շրջանի ընդհանուր իրավասության դատարան:

Դատաքննությունն արդեն ավարտվել է: Նոյեմբերի 4-ին կհրապարակվի դատարանի որոշումը:

Մինչ այդ դատարանում հեռուստաընկերության ներկայացուցչի ներկայացրած փաստական հանգամանքների համաձայն՝ Նունե Սիմոնյանն, աշխատելով «Ար» հեռուստաընկերության «Ազդարար» լրատվական հաղորդումում, 2016թ-ի փետրվարին 2 օրվա ընթացքում` փետրվարի 18-ին և 19-ին, 2 նկատողություն է ստացել, որից հետո փետրվարի 19-ին ազատվել է աշխատանքից:

Հեռուստաընկերության ներկայացուցիչը դատարանում հայտնեց, որ Նունե Սիմոնյանը չի վիճարկել իրեն ուղղված նկատողությունները, ինչը նշանակում է, որ համաձայն է եղել դրանց հետ և ընդունել է իր սխալները:

Մինչդեռ Նունե Սիմոնյանի փաստաբան Էռնեստ Աբելյանը դատարանում պահանջեց, որ հեռուստաընկերության ղեկավարությունը ներկայացնի նաև օրենքով պահանջված երրորդ կարգապահական տույժի կիրառման մասին ապացույցները:

«Համաձայն ՀՀ Աշխատանքային օրենսգրքի՝ անձի հետ կնքված աշխատանքային պայմանագիրը կարող է լուծվել, եթե տվյալ աշխատակիցը երկու անգամ կարգապահական տույժի է ենթարկվում, և այդ կարգապահական տույժերը դեռ չմարված` չհանված, ստանում է երրորդ կարգապահական տույժը»,- դատական նիստից հետո` ներկայացնելով հայցադիմումի հիմքում դրված օրենքի դրույթը` նշեց փաստաբանը:

Էռնեստ Աբելյանը նաև հավելեց, որ անգամ երկու կարգապահական տույժերը ներկայացվել են սահմանված կարգի խախտմամբ, այն է` Նունե Սիմոնյանից կատարած խախտման համար բացատրություն չի պահանջվել, նրան այդ պահանջով գրություն չի ներկայացվել:

Հեռուստաընկերության ներկայացուցչի խոսքով՝ Նունե Սիմոնյանի և լրատվականի բաժնի ղեկավար Եվա Մեհրաբյանի միջև կոնֆլիկտ է եղել, որն ազդել է աշխատանքի և լրագրողի հեղինակած նյութերի որակի վրա: Հենց դրանով է հեռուստաընկերության ներկայացուցիչը բացատրում լրագրողին աշխատանքից ազատելու որոշումը: Իսկ դրանից մեկ ամիս առաջ` հունվարին, Նունե Սիմոնյանը գրավոր դիմում է ներկայացրել հեռուստաընկերության հիմնադիր Կարեն Վարդանյանի հետ հանդիպելու և առկա խնդիրները քննարկելու խնդրանքով: Բայց հանդիպումը տեղի չի ունեցել:

Ի դեպ, Նունե Սիմոնյանը չի ժխտում, որ իր անմիջական ղեկավար Եվա Մեհրաբյանի հետ ինչ-որ խնդիր, իրոք, եղել է:

«Իրականում պատճառն այն է, որ լուրերի տնօրեն Ալիկ Հակոբյանը պետք է մշտական բնակության մեկներ Կանադա, և արդեն իսկ որոշված էր, որ նրան փոխարինելու է նրա տեղակալը` Եվա Մեհրաբյանը։ Բայց քանի որ կոլեկտիվում դժգոհություններ կային, և կոլեկտիվն այնքան էլ չէր ողջունում նրա նշանակումը, և ես կոլեկտիվում մի քիչ ավելի կշիռ ունեմ` և՛ որպես ավելի փորձառու, և՛ որպես տարիքով ավելի ավագ, իրենց մտավախությունը հետևյալն էր, որ ես բունտ կկազմակերպեմ և կձախողեմ «Ազդարար» լրատվականի գործունեությունը՝ Եվա Մեհրաբյանի տնօրինության օրոք, որոշվեց ինձ ավելի շուտ հեռացնել աշխատանքից»,- իր հեռացման պատճառը Sputnik Արմենիայի հետ զրույցում այսպես էր մեկնաբանել Նունե Սիմոնյանը։

Նոյեմբերի 4-ին կհրապարակվի Նունե Սիմոնյանն ընդդեմ «Ար» հեռուստաընկերության հայցի վերաբերյալ դատարանի որոշումը: Լրագրողի փաստաբանը նշեց, որ դատավարության ընթացքից գոհ է և ակնկալում է արդար դատավճիռ:

396