Կարեն Կարապետյան

Հանրությունը դժգոհ է ԴԱՀԿ–ից. վարչապետը գիտի այդ մասին

77
(Թարմացված է 14:10 20.10.2016)
Վարչապետ Կարեն Կարապետյանի հանձնարարականներից մեկը վերաբերում է ԴԱՀԿ–ին։ Մինչ կառավարության օրակարգին անցնելը նա նշեց, որ հանրությունը դժգոհություններ ունի այդ մարմնի վերաբերյալ։

ԵՐԵՎԱՆ, 20 հոկտեմբերի — Sputnik. Վարչապետ Կարեն Կարապետյանը լսել է, որ ՀՀ արդարադատության նախարարության դատական ակտերի հարկադիր կատարման գործունեությունից հասարակությունը դժգոհ է։ Նա կոնկրետ օրինակներ բերեց, երբ ճանապարհային երթևեկության կանոնները խախտելուց հետո քաղաքացին չի ծանուցվել վարչական ակտի մասին, իսկ հետո արգելանքի տակ են դրվել նրա դրամական միջոցներն ու գույքը։

«ՀՀ արդարադատության նախարարին հանձնարարում եմ ձեռնարկել բոլոր անհրաժեշտ միջոցները, որպեսզի կատարողական վարույթ հարուցվի միայն այն դեպքում, եթե ամբողջովին պահպանված են օրենքով նախատեսված պահանջները»,- ասաց Կարապետյանը։

Նա արդարադատության նախարար Արփինե Հովհաննիսյանին հանձնարարեց նաև եռամսյակը մեկ տեղեկություն ներկայացնել, թե որ մարմինները չեն պահպանում օրենսդրական պահանջները։

Մյուս հանձնարարականով վարչապետը տվեց մեկ ամիս ժամանակ մշակելու համար անհրաժեշտ մեխանիզմներ, որպեսզի գույքին արգելանք դնելու դեպքում քաղաքացիներն անհապաղ ծանուցվեն։

77