Համաներման քաղաքական ու մարդկային գործոնները
ԵՐԵՎԱՆ, 22 սեպտեմբերի — Sputnik. Ինչպես ամեն տարի, այս տարի ևս դեռևս սեպտեմբերի 21-ին ընդառաջ հասարակության շրջանում ակտիվացան հնարավոր համաներման մասին խոսակցությունները: Ընդ որում, համաներմանը սպասում են ոչ միայն ազատազրկման վայրերում հարազատներ ունեցողները, այլև` ամբողջ հասարակությունը: Քրեական արդարադատության փորձագետ Արշակ Գասպարյանն այս հանգամանքը բացատրում է համաներման որոշման քաղաքական ենթատեքստով:
«Եթե հասարակությունը սպասում է համաներման, ապա սպասում է նաև հասարակության մեջ տեղ գտած դրական կերպարների, սպասված մարդկանց վերադարձին հասարակություն,- ասում է փորձագետը:- Այո, և՛ «Սասնա ծռերի» գործով, և՛ Ժիրայր Սեֆիլյանի, և՛ Շանթ Հարությունյանի, և՛ մնացած բոլոր մեր քաղբանտարկյալների սպասումը կա, և դա իզուր չէ: Գոնե հասարակությունը հասկանում է, որ այդ մարդիկ այնտեղ են հայտնվել գաղափարական այլախոհության պատճառով, և նրանց վրա դրված հոդվածները միգուցե կընկնեն համաներման տակ, և այդ մարդիկ ազատ կարձակվեն»:
Իսկ թե հնարավոր համաներումը որքանով կտարածվի հենց «Սասնա ծռեր» խմբի անդամների վրա, Արշակ Գասպարյանի դիտարկմամբ, կախված է այն բանից, թե քրեական օրենսգրքի որ հոդվածներով նրանց մեղադրանք կառաջադրվի: Քրեական արդարադատության մասնագետը հիշեցնում է, որ համաներման ակտը տարածվում է միայն թեթև և միջին ծանրության հանցագործություններում մեղադրվող անձանց վրա:
Բայց հասարակությունից առավել համաներմանը սպասում են հենց պետական կառույցներում, օրինակ` դատարաններում:
«Երբ մարդիկ ենթադրում են կամ այստեղից-այնտեղից տեղեկություններ են ունենում, որ կարող է լինել համաներում, դատարաններում այդ քրեական գործերն ուղղակի չեն քննվում: Լռելյայն համաձայնություն կա դատարանների և դատախազների ու փաստաբանների միջև, թե՝ քանի որ շուտով համաներում է լինելու, սպասենք, մինչև այս հոդվածների մասին համաներումը կլինի»,- ասում է Գասպարյանը:
Փորձագետն ինքը համաներման ինստիտուտի կողմնակից չէ, քանի որ համաներումը ոչ թե անձին է դիտարկում, այլ միայն նրան վերագրված արարքը՝ անկախ այն հանգամանքից, թե ովքեր կհայտնվեն համաներվողների ցանկում:
Այսպիսով, շատ հաճախ համաներմամբ ազատությունում հայտնված անձը քիչ անց դարձյալ վերադառնում է ՔԿՀ:
«Չի բացառվում, որ մենք ևս մեկ անգամ (չգիտեմ` համաներում կլինի, թե ոչ) կարող ենք ունենալ մարդկանց մի խումբ, որոնք կվերադառնան հասարակություն և շատ արագ նորից հետ կգնան ՔԿՀ-ներ, ինչպես շատ անգամներ եղել է»,- ասում է նա:
Խնդիրն, ըստ Արշակ Գասպարյանի, նրանում է, որ հայաստանյան արդարադատության համակարգն ազատազրկման դատապարտված անձին չի նախապատրաստում հասարակություն վերադառնալուն: Թեև կան օրենքներ, բայց իրականում չեն գործում վաղաժամկետ ազատման, պատժի ռեժիմը թեթևացնելու գործառույթները:
Վերջին անգամ Հայաստանի Հանրապետությունում համաներում է հայտարարվել 3 տարի առաջ՝ 2013թ-ին, Հայաստանի Հանրապետության անկախության հռչակման 22-րդ տարեդարձի կապակցությամբ: Համաձայն գործող Սահմանադրության` ՀՀ նախագահը համաներում հայտարարելու մասին իր առաջարկությունն ուղարկում է Ազգային ժողովի նախագահին: ԱԺ համապատասխան հանձնաժողովներում քննարկվելուց հետո նախագահի ներկայացրած նախագիծն ԱԺ քննարկմանն է դրվում արտահերթ կարգով:
Հայաստանն այս տարի չի մասնակցի «Եվրատեսիլին»
(Թարմացված է 14:40 05.03.2021)
Հանրային հեռուստաընկերությունը հայտարարություն է տարածել` հայտնելով, թե որն է նման որոշում կայացնելու պատճառը։ ԵՐԵՎԱՆ, 5 մարտի – Sputnik. Համապարփակ քննարկումներից և բանակցություններից հետո Հանրային հեռուստաընկերությունը հայտարարում է, որ Հայաստանն այս տարի չի մասնակցի «Եվրատեսիլ» երգի միջազգային մրցույթին:
«Տեղի ունեցած իրադարձությունները, ժամանակի սղությունը և այլ օբյեկտիվ հանգամանքներ անհամադրելի են երգի մրցույթում Հայաստանի պատշաճ ներկայացման հետ»,– նշված է հեռուստաընկերության տարածած հաղորդագրության մեջ, որը հրապարակվել է Facebook–ում:
Հիշեցնենք` «Եվրատեսիլ 2020» երգի մրցույթը չեղարկվեց կորոնավիրուսի համավարակի պատճառով։ Մրցույթը նախատեսված էր Ռոտերդամում մայիսի 12-ին, 14-ին և 16-ին: Եվրոպայի հեռարձակողների միությունը որոշեց չեղարկել այն կորոնավիրուսի համավարակի պատճառով: Հայաստանը պետք է ներկայացներ Աթենա Մանուկյանը։
«Եվրատեսիլ 2021» երգի միջազգային մրցույթն այս տարի կանցկացվի նոր ձևաչափով։ Ռոտերդամում անցկացվելիք մրցույթի նոր կանոնները կապված են կորոնավիրուսային իրավիճակի և վարակի տարածման կանխարգելման հետ։ «Եվրատեսիլի» մասնակից երկրների պատվիրակություններին խորհուրդ կտրվի Նիդեռլանդներ մեկնելուց առաջ հինգ օրով ինքնամեկուսանալ։ Իսկ թռիչքից 72 ժամ առաջ կորոնավիրուսն ախտորոշող թեստ հանձնելը և դրա բացասական արդյունքի առկայությունը պարտադիր է։
Հայաստանի հավաքականի նախկին ֆուտբոլիստը Հարավային Ամերիկայում ՀՖՖ դեսպան է նշանակվել
(Թարմացված է 14:39 05.03.2021)
Ֆուտբոլիսն ասել է, որ շատ երջանիկ է կրկին հայկական ֆուտբոլում ներգրավված լինելու հնարավորության համար։ ԵՐԵՎԱՆ, 5 մարտի – Sputnik. Հայաստանի ազգային հավաքականի նախկին կիսապաշտպան Մարկոս Պիզելին նշանակվել է Հարավային Ամերիկայում ՀՖՖ դեսպան: Տեղեկությունը հայտնում է Հայաստանի ֆուտբոլի ֆեդերացիայի մամուլի ծառայությունը։
ՀՖՖ պաշտոնական կայքի հետ զրույցում Մարկոս Պիզելին խոսել է իր զգացողությունների, ծրագրերի և նպատակների մասին։
«Շատ երջանիկ եմ կրկին հայկական ֆուտբոլում ներգրավված լինելու հնարավորության համար: Կանեմ առավելագույնը՝ Հայաստանին վերադարձնելու այն ամենը, ինչ այդ երկիրն է տվել ինձ: Իմ գործառույթներից մեկը կլինի տարբեր միջոցառումների ժամանակ Հայաստանը ներկայացնելը: Բացի այդ, ես պետք է ավելի սերտ հարաբերություններ հաստատեմ Հարավային Ամերիկայում հայկական սփյուռքի հետ: Հնարավոր է՝ կարողանամ նոր ֆուտբոլիստներ հայտնաբերել, որոնք ապագայում կհամալրեն Հայաստանի ազգային հավաքականը: Ես մեծ ցանկություն ունեմ սովորելու: Վստահ եմ՝ ՀՖՖ-ն կաջակցի ինձ այդ հարցում, իսկ ես կփորձեմ իմ ներդրումն ունենալ հայկական ֆուտբոլի զարգացման գործում»,– ասել է նա:
ՀՖՖ նախագահ Արմեն Մելիքբեկյանը ևս անդրադարձել է Մարկոս Պիզելիի նշանակմանը:
©
Sputnik / Asatur Yesayants
«Մոտ մեկ ամիս առաջ արդեն հայտարարել էինք Յուրա Մովսիսյանի՝ Հյուսիսային Ամերիկայում ՀՖՖ դեսպան նշանակվելու մասին: Այժմ որոշել ենք, որ նմանատիպ գործառույթներով Հարավային Ամերիկայում կզբաղվի մեր նշանավոր ֆուտբոլիստներից ևս մեկը՝ Մարկոս Պիզելին: Մենք շարունակում ենք հավատարիմ մնալ մեր որդեգրած քաղաքականությանը. մեզ համար շատ կարևոր է, որպեսզի Հայաստանի ազգային հավաքականում մեծ ներդրում ունեցած ֆուտբոլիստները շարունակեն ներգրավված մնալ հայկական ֆուտբոլում, իրենց փորձն ու գիտելիքները ծառայեցնեն հայկական ֆուտբոլի զարգացմանը: Հարավային Ամերիկան շատ կարևոր տարածաշրջան է մեզ համար: Այստեղ կան հայկական մեծաքանակ համայնքներ, որոնցում շատ են ֆուտբոլով զբաղվող երիտասարդները: Վստահ եմ, որ Մարկոս Պիզելին հենց այն անձնավորությունն է, որը կարող է գտնել հայազգի ֆուտբոլիստներ, որոնք կարող են համալրել Հայաստանի տարբեր տարիքային հավաքականները»,– ասել է Մելիքբեկյանը:
Հիշեցնենք` հունվարի 11-ին հայտնի դարձավ, որ Բրազիլիայում անհատական պարապմունքների ժամանակ ստացած վնասվածքի պատճառով ֆուտբոլիստը հավելյալ բուժզննում է անցել Հայաստանում, և պարզ է դարձել, որ նրան անհրաժեշտ է վիրահատություն, որից, սակայն, Պիզելին հրաժարվել է և որոշել է ավարտել իր կարիերան:
Հայաստանի ազգային հավաքականի կազմում Պիզելին անցկացրել է 66 խաղ ու դարձել 11 գոլի հեղինակ: Բրազիլացի ֆուտբոլիստը 35 տարեկան է։
«Սպուտնիկ Լայթ» պատվաստանյութի ուսումնասիրության երկրորդ փուլն ավարտվել է
(Թարմացված է 14:53 05.03.2021)
Տեղեկացվում է, որ երրորդ փուլի անցկացման թույլտվությունն արդեն կա, այն տրամադրվել է փետրվարի կեսերին:ԵՐԵՎԱՆ, 5 մարտի - Sputnik. Ռուսաստանում ավարտվել է «Սպուտնիկ Լայթ» պատվաստանյութի կլինիկական փորձարկումների երկրորդ փուլը։ Տեղեկությունը հայտնել է Ռուսաստանի առողջապահության նախարար Միխայիլ Մուրաշկոն:
«Հիմա տվյալներն ուղղվել են փորձագիտական գնահատական ստանալու», - ասել է նա լրագրողներին։
©
Sputnik / Валерий Мельников
Երրորդ փուլի անցկացման թույլտվությունն արդեն կա, այն տրամադրվել է փետրվարի կեսերին: Այս ուսումնասիրությունը կկատարվի երկու խմբերի համար։ Կօգտագործվի նաև պլացեբո։ Ուսումնասիրությունը պետք է ավարտվի մինչև 2022 թվականի հունվարի 28-ը:
«Սպուտնիկ Լայթ» պատվաստանյութը մտնում է «Սպուտնիկ» շարքի մեջ, այն մշակվել է Գամալեայի կենտրոնի կողմից՝ մարդու ադենովիրուսային վեկտորների լավ ուսումնասիրված հարթակում ուղղակի ներդրումների ռուսական հիմնադրամի հետ համատեղ:
Ուղղակի ներդրումների ռուսական հիմնադրամի ղեկավար Կիրիլ Դմիտրիևի խոսքով՝ «լայթ տարբերակը» հիմնականում ուղղված է արտաքին շուկաներին, որտեղ կան ուժեղ համաճարակային օջախներ, իսկ Ռուսաստանում առաջատար կմնա «Սպուտնիկ V»-ն:
Ռուսաստանի թշնամիները վախենում են «Սպուտնիկ V»-ի հաջողությունից. Դմիտրիև
Գամալեայի կենտրոնի տնօրեն Ալեքսանդր Գինցբուրգն ասել է, որ այդ երկրներում «Սպուտնիկ Լայթի» օգտագործումը հնարավորություն է տալիս նվազեցնել հիվանդացության մակարդակն ու ծանրաբեռնվածությունը տեղական առողջապահության համար: Նա ավելացրել է, որ պատվաստումից հետո իմունիտետը կպահպանվի, ամենայն հավանականությամբ, մոտ երեք-չորս ամիս, իսկ պատվաստման արդյունավետությունը կկազմի մոտ 85%:
Սխեման ներառում է միայն մեկ ներարկում («Սպուտնիկ V»-ի առաջին բաղադրիչը) ու կարճ ժամանակահատվածում հակամարմինների արտադրություն։ Ընդ որում, նույնիսկ եթե պատվաստվածը վարակվի կորոնավիրուսով, նրան հիվանդության ծանր ընթացք չի սպառնում, քանի որ վիրուսի հարուցիչը թոքեր չի իջնի: Պաշտպանությունը երկարացնելու համար երեք ամիս անց կարելի է ներարկել երկրորդ մասը: