Վալերի Պերմյակով

Որտե՞ղ պատիժը կկրի Վալերի Պերմյակովը

37
(Թարմացված է 15:56 13.09.2016)
Վալերի Պերմյակովի պատժի կրման վայրը կորոշի Արդարադատության նախարարությունը՝ ռուսական կողմի հետ քննարկման արդյունքում, երբ կկայացվի նրա նկատմամբ վերջնական դատական ակտը: Այս մասին այսօր ԱԺ-ում հայտարարեց ՀՀ ԳԴ թեկնածու Արթուր Դավթյանը:

ԵՐԵՎԱՆ, 13 սեպտեմբերի — Sputnik. Թե որտեղ իր պատիժը կկրի Գյումրիում Ավետիսյանների ընտանիքի սպանության համար մեղադրվող Վալերի Պերմյակովը, պարզ կդառնա միայն նրա նկատմամբ ընթացող դատավարության և վերջնական դատական ակտի կայացումից հետո: Այս մասին այսօր ԱԺ-ում հայտարարեց ՀՀ գլխավոր դատախազի թեկնածու Արթուր Դավթյանը՝ պատասխանելով պատգամավոր Տիգրան Ուրիխանյանի հարցին:

Լրագրողներին առաջին անգամ թույլատրվել է նկարահանումներ կատարել Ավետիսյանների տանը
© Sputnik. Արմենուհի Մխոյան

«Պերմյակովի պատժի կրման խնդիրը կարող է քննարկման առարկա դառնալ միայն այն բանից հետո, երբ օրինական ուժի մեջ կմտնի նրա նկատմամբ կայացված դատական ակտը։ Բայց այդ փուլում արդեն քննարկման առարկա է դառնալու արդեն ոչ թե դատախազության, այլ Արդարադատության նախարարության կողմից»,- ասաց Արթուր Դավթյանը։

Դատախազի թեկնածուն նաև հիշեցրեց, որ հարցը քննարկման առարկա կարող է դառնալ, եթե Ռուսաստանի Դաշնությունը ցանկություն հայտնի, որ Վալերի Պերմյակովը պատիժը կրի այդ երկրի տարածքում գտնվող ՔԿՀ-ում:

Գյումրիում, որտեղ տեղակայված է 102-րդ ռուսական ռազմակայանը, 2015 թվականի հունվարի 12-ին սպանվել էր մի ամբողջ ընտանիք, մեկուկես տարեկան երեխան մահացել էր մեկ շաբաթ անց հիվանդանոցում։ Հանցագործության կասկածանքով նույն օրը ձերբակալվել էր ռուս պայմանագրային զինծառայող Վալերի Պերմյակովը: Նա փորձել էր անցնել Թուրքիայի տարածք, և ռուս սահմանապահները նրան հայտնաբերել էին հենց սահմանին: Զենք հափշտակելու և դասալքության համար 2015 թվականի օգոստոսի 12-ին Գյումրիում դատարանը Պերմյակովին դատապարտել է 10 տարի ազատազրկման։ Սպանության մասին գործը հանձնվել է հայկական կողմին և քննվում է առանձին, առաջին նիստը տեղի էր ունեցել դեկտեմբերի 18-ին
37