Խոզեր

Արտակարգ պատահար սահմանամերձ Տավուշում. վրացական կերը թունավոր է եղել

172
(Թարմացված է 15:56 31.08.2016)
Տավուշի մարզի Նավուր և մյուս գյուղերում մասսայական ոչնչանում են խոզերը։ Փորձաքննությունը պարզել է, որ պատճառը կերն է, որը բերվել է Վրաստանից։ Անասնապահները խուճապի մեջ են։

ԵՐԵՎԱՆ, 31 օգոստոսի — Sputnik.  Տավուշի Նավուր գյուղի անասնապահ Արտակ Լուլուկյանը հանրապետության հեռավոր մարզից հասել է Երևան՝ Sputnik Արմենիայի միջոցով ահազանգելու սահմանային գյուղում տեղի ունեցող անասունների մասսայական ոչնչացման մասին։

Խուճապը դեռևս հուլիսի կեսերին է սկսվել, երբ Արտակ Լուլուկյանի խոզերի կերը վերջացել է, և նա գնել է վրացական կեր։

Նրա 30 խոզը սատկել է՝ ուռելով ու մի քանի օր գետնին թավալվելով անցկացնելուց հետո։

Սատկել են ոչ միայն Արտակի խոզերը, այլև հարևաններինը և բոլոր նրանց, ովքեր գնել են վրացական արտադրության այդ կերը։ Ավելին, անասնապահի խոսքով, հիվանդությունը ինֆեկցիոն բնույթ է կրում, քանի որ, կողք կողքի լինելով, նաև այն խոզերն են հիվանդանում, որոնց չեն տվել տվյալ կերը։

Անհանգստացած անասնապահը անմիջապես դիմել է գյուղի, այնուհետև՝ Բերդի անասնաբույժներին։ Նրան պատասխանել են, որ խոզերը թունավորված են, իսկ կերը անհրաժեշտ է ներկայացնել Երևանի լաբորատորիա։

Артак Лулукян
Асатур Есаянц
Տավուշի Նավուր գյուղի բնակիչ Արտակ Լուլուկյանը

Արտակ Լուլուկյանն այդպես էլ վարվել է, և արդյունքը գերազանցել է նույնիսկ ամենավատ կանխատեսումը։

Նրան նախ մեկ նախադասությամբ ասել են՝ այդ կերի մեջ ամեն ինչ կա, բացի կերից, հետո «Հանրապետական անասնաբուժասանիտարական և բուսասանիտարական լաբորատոր ծառայությունների կենտրոն» ՊՈԱԿ-ը անասնաբուժական փորձաքննության մասնագիտական եզրակացություն է տվել այն մասին, որ ներկայացված մեկ նմուշի խոզի կերի մեջ հայտնաբերվել են աղիքային խմբի մանրէներ, բոբոսասունկ։
Եզրակացությունը հաստատել են մանրէաբանները, անասնաբուժական հետազոտությունների լաբորատորիայի ղեկավարը։

Արտակ Լուլուկյանը, փաստաթուղթը ձեռքին, գնացել է գյուղատնտեսության նախարարություն, որտեղ նրան ասել են, որ նախարարությունը կապ չունի այդ կերի հետ։

Նա պատմեց, որ գյուղացիները, այդ թվում և ինքը, անասուն գնելու, պահելու համար վարկեր են վերցրել և հիմա մնացել են ձեռնունայն։ Պարտքերի ու հոգսերի բեռի տակ կքած գյուղացին մի քանի ժամում կորցրել է ամբողջ ունեցվածքը, կանգնել ամեն ինչ կորցնելու վտանգի առջև։

документ
© Sputnik/
Լաբորատոր փորձաքննության եզրակացությունը

Ինչպե՞ս է վրացական կերը Հայաստան ներմուծվել, արդյո՞ք բոլոր փաստաթղթերը առկա են եղել ներմուծելիս, ինչո՞ւ ոստիկանությունը գործը չի հետաքննում, եթե անասնապահը դիմել է իրենց, ո՞վ պետք է պատասխանատվություն կրի և հատուցի գյուղացիներին պատճառած վնասը։

Sputnik Արմենիան կհետևի դեպքերի ընթացքին և կտեղեկացնի Տավուշի գյուղերում տիրող իրավիճակի մասին։

172