Премьер-министр Армении Овик Абраамян посетил боевые позиции в Нагорном Карабахе

ՀՀ վարչապետ. ԼՂՀ անկախության ճանաչման անհրաժեշտություն առայժմ չկա

30
(Թարմացված է 12:50 11.05.2016)
ՀՀ վարչապետը նշեց, որ եթե շարունակվի պատերազմը, ապա Հայաստանը ստիպված կլինի գնալ ԼՂՀ ճանաչման քայլին

ԵՐԵՎԱՆ, 11 մայիսի — Sputnik. ԼՂՀ անկախության ճանաչման անհրաժեշտություն առայժմ չկա, չորեքշաբթի լրագրողների հետ զրույցում ասաց ՀՀ վարչապետ Հովիկ Աբրահամյանը։
Նա հիշեցրեց, որ ՀՀ նախագահն այս հարցի վերաբերյալ իր դիրքորոշումը հստակ հայտնել է։

«Եթե շարունակվի պատերազմը, մենք ստիպված կլինենք գնալ այդ քայլին»,- ասաց վարչապետը։

Ինչ վերաբերում է ՀՀ նախագահ Սերժ Սարգսյանի հանձնարարությամբ Լեռնային Ղարաբաղի հետ ռազմական փոխօգնության պայմանագրի նախապատրաստման ընթացքին, Աբրահամյանը չհամաձայնեց դիտարկմանը, թե այն ուշանում է, և հայտնեց, որ այն «քննարկման, նախապատրաստական փուլում է»։

Ապրիլյան պատերազմի առաջին իսկ օրը` ապրիլի 2-ի երեկոյան, նախագահ Սերժ Սարգսյանն անցկացրել էր Ազգային անվտանգության խորհրդի նիստ, որի ընթացքում ԱԳՆ-ին հանձնարարել էր նախապատրաստել Լեռնային Ղարաբաղի հետ ռազմական փոխօգնության պայմանագրի տեքստը և համապատասխան քննարկումներից հետո այն ուղարկել Ազգային ժողով: Իսկ մայիսի 5-ին ՀՀ կառավարությունն ընդունեց «ԼՂՀ ճանաչման մասին» օրենքի նախագծի վերաբերյալ եզրակացություն և այն ներկայացրեց ԱԺ։

Վարչապետ Հովիկ Աբրահամյանի գլխավորած պատվիրակությունը մայիսի 8-9-ը ԼՂՀ-ում էր, որտեղ պաշտոնական անձանց հետ հանդիպումներից զատ այցելել էր նաև ղարաբաղա-ադրբեջանական հակամարտ զորքերի շփման գծի մարտական հենակետեր:

ՀՀ վարչապետը ներկայացրեց այցելությունից իր տպավորությունը։

«Սկսած զինվորներից, սպաներից, գեներալներից, քաղաքական գործիչներից` բոլորի մոտ շատ բարձր վստահություն կար մեր ապագա հաղթանակների նկատմամբ։ Քննարկել ենք նաև տնտեսական խնդիրներ»,- ասաց վարչապետը։

Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին Մոսկվայում ռազմական գործողությունները դադարեցնելու մասին պայմանավորվածություն է ձեռք բերվել, սակայն երկու կողմերն էլ հայտարարում են, որ փոխադարձ պայմանավորվածությունը պարբերաբար խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։

 

 

 

30