ԵՐԵՎԱՆ, 24 ապրիլի — Sputnik. Թուրքական իշխանությունը քրդերի հանդեպ իրականացնում է նույն քաղաքականությունը, ինչ ժամանակին իրականացրել է հայերի նկատմամբ, Ծիծեռնակաբերդում լրագրողներին ասաց Հայաստանի քրդական ազգային խորհրդի նախագահ Կնյազ Հասանովը:
«101 տարի է անցել այն պահից, երբ երիտթուրքերն Օսմանյան կայսրությունում նախապես ծրագրված ցեղասպանություն իրագործեցին ու 1.5 միլիոն հայի սպանեցին։ Այսօր 100 տարի անց Թուրքիան ցեղասպանություն է իրականացվում քուրդ ժողովրդի նկատմամբ»,- ասաց Հասանովը։
Նրա խոսքով` արդեն 6-7 ամիս է` թուրքական իշխանությունը տանկեր ու հրետանի է գործի դրել քրդաբնակ գյուղերն ու քաղաքները ոչնչացնելու համար։
«Մենք գերտերություններին կոչ ենք անում կանգնեցնել թուրք իշխանության արյունահեղ գործողությունները։ Թող միջազգային հանրությունը մի կողմ դնի իր նավթային շահերն ու զբաղվի այն երկրով, որը հարյուր տարի անց կրկին ցեղասպանություն է իրագործում իր երկրում ապրող ժողովրդի նկատմամբ»,- ասաց Հասանովը։
XX դարի սկզբին Օսմանյան կայսրությունում ավելի քան 1.5 մլն հայ սպանվեց։ Թուրքիան ավանդաբար մերժում է հայերի մեղադրանքները ցեղասպանության իրագործման հարցում և այս հարցի վերաբերյալ քննադատությունն արևմուտքի կողմից բավական ցավագին է ընդունում։
Առաջինը Օսմանյան կայսրությունում Հայոց ցեղասպանությունը 1965 թվականին ճանաչեց Ուրուգվայը, որի օրինակին հետևեցին Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, Բրազիլիան, Չիլին, Վատիկանը, Բոլիվիան, Չեխիան, Ավստրիան, Լյուքսեմբուրգը։
ԱՄՆ 50 նահանգներից 44-ը պաշտոնապես ճանաչել և դատապարտել է Հայոց ցեղասպանությունը, ինչպես նաև ապրիլի 24-ը հայտարարել Հայոց ցեղասպանության զոհերի հիշատակի օր։
