ԵՐԵՎԱՆ, 22 ապրիլի — Sputnik. «Նաիրի» ԲԿ նեյրոբուժական ծառայության ղեկավար Արման Հակոբյանը, ով 10 տարի ղեկավարել է Կենտրոնական կլինիկական զինվորական հոսպիտալի նեյրոբուժական բաժանմունքը, նշեց, որ վերջին քառօրյա ռազմական գործողությունների հետևանքով հիմնականում զինվորները ստացել են վիրավորումներ` կապված արկերի, բեկորների, կիրառված հրազենային ծանր տեխնիկայի հետ։ Մեծ խումբ են կազմում ԱԹՍ կողմից ստացված վիրավորումներով հիվանդները։
Նրա խոսքով` այս պատերազմական գործողությունների ժամանակ վիրավորումները ըստ իրենց ձևի և բարդության ավելի ծանր էին, քան, օրինակ` 90-ականներին։
Նա հայտնեց, որ Զինված ուժերում բուժծառայության առանցքը կենտրոնական կլինիկական զինվորական հոսպիտալն է, բոլոր ծանր դեպքերը կենտրոնանում են այս բուժհիմնարկում։ 2008-2012 թվականներին Կենտրոնական կլինիկական զինվորական հոսպիտալը համալրվեց նորագույն սարքավորումներով, որոնք մինչև այսօր պահպանում են իրենց արդիականությունը։
«Սակայն նշեմ, որ բացի մասնագիտական և տեխնիկական վերազննումից, Զինված ուժերում մեծ նշանակություն ունի բուժապահովումը և էտապային տեղահանումը։ Փորձը ցույց է տվել, որ ճիշտ կազմակերպչական աշխատանքը մեծ թվով վիրավորների պարագայում շատ ավելի կարևոր է և գնահատելի, քան զուտ մասնագիտական վիրաբուժական միջամտությունը»,- նշեց Հակոբյանը։
Նա փաստեց, որ քառօրյա պատերազմական գործողությունների ժամանակ ռազմական բժիշկներին օգնության հասան մեծ թվով քաղաքացիական բուժհիմնարկների, օրինակ` «Էրեբունի» և «Նաիրի» ԲԿ բուժաշխատողները, և նրանք միասին մեծ աշխատանք կատարեցին։
«Համաշխարհային փորձը ցույց է տվել, որ կան հենց նեյրովիրաբուժական պրոֆիլի` գանգուղեղային, ողնուղեղային վիրավորումներ, որոնց վիրահատությունները չպետք է կատարվեն առաջնագծում տեղակայված հոսպիտալներում, դրանք պետք է կատարվեն միմիայն փորձ ունեցող մասնագիտական և տեխնիկական ապահովվածություն ունեցող բուժհիմնարկներում, իսկ դա մեզանում Կենտրոնական կլինիկական զինվորական հոսպիտալն է»,- ընդգծեց նա։
Նրա խոսքով` այսօրվա ռեանիմացիոն-վերականգնողական միջոցառումները թույլ են տալիս կազմակերպել հիվանդի տեղահանումը` ընդհուպ մինչև 6-10 ժամ։
Հակոբյանը կարևորեց նաև վերականգնողական բուժման անհրաժեշտությունը, սակայն այսօր Հայաստանում նման մասնագիտացված կենտրոն գոյություն չունի։ Այնինչ շատ հիվանդների ոչ թե բուժում է պետք, այլ մասնագիտական խնամք։
