ԵՐԵՎԱՆ, 20 ապրիլի — Sputnik, Գոհար Սարգսյան. Երևանյան ցանկացած տոնավաճառ մտնելիս այս ու այն կողմից կլսես` թուրքական որակյալ ապրանք է, համեցեք։ Սա այն դեպքում, երբ նման գովազդի համար Թուրքիան այլ երկրներում միլիոնավոր դոլարներ է ծախսում։
Տնտեսագետ Թաթուլ Մանասերյանի խոսքով` միայն միամիտները կարող են գովազդել թուրքական ապրանքն ու զարկ տալ տնտեսությանը։
Տվյալների համաձայն` 2008-2014 թվականների ընթացքում Թուրքիայից Հայաստան է ներմուծվել 1.5 միլիարդ դոլարի ապրանք։ Սա այն դեպքում, որ Թուրքիան պաշտոնապես արգելել է Հայաստանից ապրանքների ներմուծումն իր երկիր։
«Որպեսզի մարդիկ թուրքական հագուստ կամ բանջարեղեն չգնեն, նախ պետք է կառավարությունը համապատասխան քայլեր ձեռնարկի` հարկերից ազատելով մանր բիզնեսը։ Այսպես կխրախուսվի տեղական արդյունաբերությունը»,-ասաց Թաթուլ Մանասերյանը։
«Հանուն օրենքի» նախաձեռնության անդամ Արման Ղուկասյանն էլ ցավալի տվյալ ունի` վերջին տարիներին Թուրքիայից Հայաստան ավելի մեծ թվով ապրանք է ներմուծվել, քան Խորհրդային Միության փլուզումից ի վեր։
«Չեմ կարծում, որ թուրքական ապրանքները բոյկոտելով նրանց տնտեսությունը կոլապս կապրի։ Բայց մենք դրանով ցույց կտանք մեր ազգային արժանապատվությունը։ Ապրիլյան պատերազմը ցույց տվեց, որ Թուրքիան հովանավորում է Ադրբեջանին և վարձկան ահաբեկիչներ տրամադրում։ Սրանից կարելի է եզրահանգումներ անել»,-ասաց նա։
Թուրքկ
Որպես հավելում` Թաթուլ Մանասերյանն ընդգծեց` Հայաստանում թուրքական ապրանքների լայնածավալ տարածում ու սպառում ապահովելով` մենք զենք ենք տալիս մեր թշնամու ձեռքը։
«Ի լուր աշխարհի պետք է տարածել` նա, ով թուրքական ապրանք է գնում, հովանավորում է ահաբեկչությանը։ Հայտնի է, որ Թուրքիան «Իսլամական պետություն» ահաբեկչական խմբավորման հովանավորներից մեկն է, իսկ դա չարիք է ամբողջ աշխարհի համար»,-ասաց Մանասերյանը։
Նրա անձնական նախաձեռնությամբ այսօր մի ծրագիր է առաջ մղվում, երբ «Պատրաստված է Հայաստանում» պիտակով ապրանքները կանոնավոր կերպով արտահանվում են սփյուռք։
«Հավատացեք ինձ`թուրքական ապրանքներից հրաժարվելով ոչ սոված կմնանք, ոչ էլ` մերկ»,- վստահեցրեց տնտեսագետը։
Ի դեպ, Թաթուլ Մանասերյանն ասուլիսի էր եկել հայկական ու եվրոպական արտադրության հագուստով։ Նա նշեց նաև, որ իր ընտանիքի անդամներին էլ հորդորել է չխմել հայտնի գազավորված ըմպելիքը, որն անմիջական կապ ունի Թուրքիայի հետ։
Ապրիլի 21-ին կառավարության դիմաց ցույց է կազմակերպվելու, որն ուղղված է լինելու Թուրքիայից ներմուծվող սննդատեսակների դեմ։ Ըստ ծրագրի, ակցիայի ընթացքում այրելու են թուրքական արտադրության ապրանքները։
«Մենք կներկայացնենք մեր պահանջը և կառավարությանը կհանձնենք բաց նամակ` Թուրքիայից սննդամթերք ներմուծելու վերաբերյալ»,-ասաց նախաձեռնության անդամներից մեկը` Ծովինար Կոստանյանը։
Նրա դիտարկմամբ` հարցն առաջնային է, քանի որ գուցե հենց վաղը Թուրքիայից թունավորված ապրանքներ ներմուծվեն, ու դա որպես «բակտերիալ զենք» կիրառվի։
