ԵՐԵՎԱՆ, 18 ապրիլի — Sputnik. Crime Index For Country 2016 զեկույցում ներկայացվում է աշխարհի տարբեր երկրներում հանցագործության և ապահովության ցուցիչը, որը ցույց է տալիս, թե որ երկրներն են առավել անվտանգ և վտանգավոր։ Զեկույցը հրապարակվել է վիճակագրական տարբեր տվյալների ուսումնասիրությամբ զբաղվող Numbeo կազմակերպության պաշտոնական կայքէջում։
Վարկանիշում ներառված 117 երկրի ցանկում Հայաստանը զբաղեցնում է 25-րդ հորիզոնականը, քրեածին իրավիճակը գնահատվում է 31,11%, իսկ անվտանգության ցուցիչը՝ 68,89%։
Հարավային Կովկասի երկրներից առաջատարը Վրաստանն է (6-րդ հորիզոնական), որտեղ անվտանգության ցուցիչը կազմում է 77,84%։ Ադրբեջանը գտնվում է 31-րդ տեղում, որտեղ անվտանգության ցուցիչը 67,61% է։
Ռուսաստանը զբաղեցնում է 68-րդ հորիզոնականը, և քրեածին վիճակը գնահատվում է 47,31%, իսկ անվտանգության ցուցիչը՝ 52,69%։
Վարկանիշի համաձայն` աշխարհում ամենաապահով երկիրը Հարավային Կորեան է, որտեղ հանցագործության ցուցիչը գնահատվում է 14,31%, իսկ անվտանգության ցուցիչը՝ 85,69%։ Հարավային Կորեային հաջորդում են Սինգապուրը, Ճապոնիան, Հոնկոնգն ու Թայվանը։
Աշխարհի ամենավտանգավոր երկիրը Վենեսուելան է, որտեղ հանցավորության ցուցիչը 84,44% է, իսկ անվտանգության ցուցիչը՝ 15,56%։