Шаварш Кочарян

ԻՀԿ փաստաթուղթն աղավաղում է Լեռնային Ղարաբաղի խնդրի էությունը

49
ՀՀ արտգործնախարարի տեղակալ Շավարշ Քոչարյանը մեկնաբանել է Ստամբուլում կայացած գագաթնաժողովում Իսլամական համագործակցության կազմակերպության ամփոփիչ փաստաթղթում Լեռնային Ղարաբաղի վերաբերյալ տեղ գտած դրույթները

ԵՐԵՎԱՆ, 17 ապրիլի — Sputnik. Ադրբեջանի և Թուրքիայի դրդմամբ փաստաթղթում տեղ գտած ձևակերպումներն ամբողջությամբ աղավաղում են Լեռնային Ղարաբաղի հակամարտության էությունը, որն արդյունք է Ադրբեջանի՝ Լեռնային Ղարաբաղի ժողովրդի ինքնորոշման իրավունքը ռազմական եղանակով ճնշելու քաղաքականության, կարծում է ՀՀ արտգործնախարարի տեղակալ Շավարշ Քոչարյանը:

«Տվյալ ձևակերպումներով մերժվում է ժողովուրդների ինքնորոշման իրավունքի նկատմամբ հարգանքը, որը հանդիսանում է նաև Իսլամական համագործակցության կազմակերպության նպատակներից մեկը և որի հիման վրա ձևավորվել է այդ կազմակերպության անդամ պետությունների մեծամասնությունը»,- նշում է Քոչարյանը:

Նրա խոսքով՝ Ադրբեջանը ներկայացվում է որպես զոհ, ինչը նա համարելու է աջակցություն՝ Լեռնային Ղարաբաղի հակամարտությանը կրոնական երանգ հաղորդելու իր ջանքերին:

Շավարշ Քոչարյանի կարծքով՝ տարակուսանք է առաջացնում, որ ինքնորոշված ժողովրդի դեմ պայքարող Ադրբեջանը և տարածաշրջանում անկայունության, ահաբեկչության և արյունահեղության ալիք տարածող Թուրքիան կարողացան իրենց՝ միջազգային և միջնորդ երկրների ջանքերին հակադիր սադրիչ մոտեցումները հերթական անգամ ներառել Իսլամական համագործակցության կազմակերպության փաստաթղթում:

Իսլամական համագործակցության կազմակերպությունը Ստամբուլում ավարտված գագաթնաժողովի ամփոփիչ փաստաթղթում, մասնավորապես, ղարաբաղյան շփման գծում մարտական գործողությունների համար մեղադրում է Հայաստանին՝ դատապարտելով «հայկական զինված ուժերի շարունակական հարձակումները Ադրբեջանի Հանրապետության (այսպես կոչված) օկուպացված տարածքներում», և իր աջակցությունն է հայտնում Ադրբեջանին՝ պահանջելով «Հայաստանի զինված ուժերն անհապաղ, լիակատար և անվերապահորեն դուրս բերել Լեռնային Ղարաբաղի տարածաշրջանից ու Ադրբեջանի այլ (այսպես կոչված) օկուպացված տարածքներից»։

49