Газопровод

Քաղաքական տեխնոլոգ. Հայաստանի համար ռուսական գազի գինը կնվազի 15%–ով

56
(Թարմացված է 20:05 26.03.2016)
Հայաստանի վարչապետ Հովիկ Աբրահամյանը մարտի 25-ին հայտարարել է, որ Ռուսաստանից առաքվող բնական գազի սակագինը հայ սպառողների համար կնվազի

ԵՐԵՎԱՆ, 26 մարտի — Sputnik, Դավիթ Գալստյան. Հայաստանի համար ռուսական գազի սակագինը կնվազի մինչև 15 տոկոս, Sputnik Արմենիային ասաց քաղաքական տեխնոլոգ Վիգեն Հակոբյանը:

«Երեկ վարչապետը դե ֆակտո հաստատեց, որ գազի սակագինը կնվազի, հարցը միայն այն է, թե որքան: Կարծում եմ, որ սակագնի շուրջ բանակցություններն արդեն ավարտվել են, մնացել է այն հարցը, թե ինչ «փաթեթավորմամբ» ներկայացնել դա հասարակությանը»,- ասաց Հակոբյանը:

Նրա խոսքով՝ այդ տեղեկատվությունը կհրապարակվի Դմիտրի Մեդվեդևի և Սերժ Սարգսյանի հանդիպման ժամանակ, այդ պատճառով Հայաստանի վարչապետը մինչև հիմա պաշտոնական հայտարարություն չի արել:

«Իմ կարծիքով՝ գազի գինը կնվազի շուրջ 15 տոկոսով: Ամենայն հավանականությամբ` այդ մասին քաղաքական որոշում կայացվել է Սարգսյանի և Պուտինի վերջին հանդիպման ժամանակ»,- ասաց Հակոբյանը:

Նա նշեց, որ գազի սակագնի վերաբերյալ սպասումները գոյություն ունեն բավական երկար ժամանակ, և երկու երկրների իշխանությունները երկարաձգում են որոշման հրապարակումը, որպեսզի այն ավելի մեծ ազդեցություն ունենա:

Ավելի վաղ Ռուսաստանը Հայաստանի համար երկարացրել էր հազար խորանարդ մետր գազի համար 165 դոլար արտոնյալ գինը մինչև 2016թ.-ի առաջին եռամսյակը: Ներկա պահին Ռուսաստանը բնական գազի հիմնական առաքողն է Հայաստան, որը մատակարարվում է Վրաստանի տարածքով:

 

 

56