Президент Армении Серж Саргсян

Հայաստանի նախագահն ԱՄՆ–ում կմասնակցի Միջուկային անվտանգության գագաթնաժողովին

29
ԱՄՆ–ում ՀՀ նախագահը կհանդիպի մի շարք պաշտոնյաների հետ, ինչպես նաև կայցելի կրթական հաստատություններ

ԵՐԵՎԱՆ, 26 մարտի- Sputnik. Նախագահ Սերժ Սարգսյանը մարտի 28-ին աշխատանքային այցով կմեկնի Ամերիկայի Միացյալ Նահանգներ՝ մասնակցելու Վաշինգտոնում կայանալիք Միջուկային անվտանգության գագաթնաժողովին, որի շրջանակներում ՀՀ նախագահը նաև մի շարք հանդիպումներ կունենա, հայտնում է երկրի ղեկավարի մամուլի ծառայությունը:

Հանրապետության նախագահի ԱՄՆ աշխատանքային այցը կմեկնարկի Բոստոնից, որտեղ Սերժ Սարգսյանը հանդիպում կունենա Մասաչուսեթսի նահանգապետի, համայնքային ղեկավարների և Ներկայացուցիչների պալատի անդամների հետ: Նախագահը կհյուրընկալվի Մասաչուսեթսի տեխնոլոգիաների ինստիտուտում, կայցելի կրթական այդ հաստատության մեդիա լաբորատորիա, «Սամբերգ» համաժողովների կենտրոնում հանդիպում կունենա ամերիկահայ գիտնականների հետ: Նախատեսված է նաև նախագահի հանդիպումը «Լույս» հիմնադրամի կրթաթոշակառուների և շրջանավարտների հետ:

Սերժ Սարգսյանը կայցելի իրավունքի և դիվանագիտության Ֆլեթչեր դպրոց՝ հանդիպում կունենա համալսարանի ղեկավարության, պրոֆեսորադասախոսական կազմի և «Թավիթյան» հիմնադրամի կրթական ծրագրի մասնակից ՀՀ քաղաքացիների հետ: Հարվարդի համալսարանի Քենեդիի անվան կառավարման դպրոցում նախագահը հանդես կգա դասախոսությամբ և կհանդիպի հայ ուսանողների ու համալսարանի ղեկավարության հետ:

Նախատեսված է նախագահի այցելություն նաև հայաշատ Ուոթերթաուն քաղաք: Սերժ Սարգսյանը կհյուրընկալվի Ամերիկայի հայկական գրադարան-թանգարանում, հանդիպում կունենա հայ համայնքի ներկայացուցիչների հետ, կայցելի տեղի հայկական կենտրոններ և եկեղեցիներ, ինչպես նաև «Հայկական ժառանգության պուրակ», որտեղ հիմնված հուշահամալիրում հարգանքի տուրք կմատուցի Հայոց ցեղասպանության զոհերի հիշատակին:

 

 

29