ԵՐԵՎԱՆ, 25 մարտի – Sputnik. ՀՀ նախագահի ռուսաստանյան այցի ընթացքում ՌԴ նախագահի հետ քննարկվել է գազի գնի վերանայման հարցը, որից հետո համապատասխան գերատեսչություններին հանձնարարականներ են տրվել՝ «քննարկումներ անցկացնել նվազման ուղղությամբ»: Այս մասին այսօր լրագրողների հետ զրույցում ասաց վարչապետ Հովիկ Աբրահամյանը
«Որ նվազելու է, փաստ է, իսկ թե որքանով, քննարկումների ընթացքում կճշտենք»,- ասաց նա։
Ինչ վերաբերում է իրանական գազամուղը Հայաստանով անցկացնելու հնարավորությանը, Հովիկ Աբրահամյանը չբացառեց, որ այն կարող է անցնել ինչպես մեր երկրով, այնպես էլ` Ադրբեջանով ու Վրաստանով:
«Ամեն ինչ հնարավոր է: Յուրաքանչյուր երկիր իր շահը դիտարկելով, փորձում է նաև Ադրբեջանով, Վրաստանով անցկացնել, բայց մենք նույնպես աշխատում ենք, քննարկում ենք»,- ասաց վարչապետը՝ ավելացնելով, որ հարցի պատասխանը պարզ կդառնա մինչև տարեվերջ, քանի որ տարվա ընթացքում նախատեսված է իր այցը ԻԻՀ և միջկառավարական հանձնաժողովի նիստը:
Ընտրական օրենսգրքի վերաբերյալ ընդդիմության առաջարկներին անդրադառնալով` Հովիկ Աբրահամյանը նշեց, որ դրանք այժմ քննարկվում են և ողջամիտ առաջարկները կընդունվեն, ընդ որում՝ ոչ միայն ընդդիմության, այլև հասարակական կազմակերպությունների կողմից ներկայացվածները:
«Բազմաթիվ առաջարկներ կան, որ արդեն ընդգրկման փուլում են, և մի քանի օր հետո մենք այդ տեղեկությունը կտարածենք, թե որ առաջարկություններն են ընդունվել»,- ասաց Հովիկ Աբրահամյանը:
Վարչապետն անդրադարձավ նաև ԵՏՄ տարածքից գնված ավտոմեքենաներից ԱԱՀ գանձելու մասին լուրերին՝ բացառելով նման հնարավորությունը և միաժամանակ հորդորելով լրագրողներին նման դեպքերի մասին հայտնել կառավարությանն ու օգնել պատժել ապօրինություն գործողներին:
