Премьер-министр Армении Овик Абраамян вручает студентам сертификаты оплаты их учебы Молодежным фондом Армении

Հայաստանի 794 ուսանողի ուսման վարձը կփոխհատուցի կառավարությունը

526
(Թարմացված է 19:42 22.03.2016)
Վարչապետ Աբրահամյանը ուսանողներին հավաստիացրեց, որ կառավարությունն ապագա սերնդին աջակցելու է բոլոր հարթակներում

ԵՐԵՎԱՆ, 22 մարտի — Sputnik. Երևանի Մխիթար Հերացու անվան բժշկական համալսարանի դահլիճում հավաքված ուսանողները հուզված ու անհանգիստ սպասում էին Հայաստանի Երիտասարդական հիմնադրամին ուղղված իրենց դիմումների պատասխանին: Հիմնադրամի նախագահի հայտարարությունից հետո լարվածությունն անցավ, դահլիճում պայթեցին ծափահարությունները: Ընտրված 794 ուսանողի ուսման վարձն այս տարի կփոխհատուցի ՀՀ կառավարությունը:

Էդգար Մնացականյանն Ագրարային համալսարանի ուսանող է դարձել դեռևս 2013թ-ին, բայց միայն այս տարի է իրավունք ստացել նստել ուսանողական նստարանին: Վճարովի համակարգ ընդունվելով` Էդգարը զորակոչվել է բանակ և ծառայությունից վերադառնալուց հետո միայն միացել իր ուսանող ընկերներին: Էդգարը մեկն է այն ուսանողներից, ում արժանիքները գնահատելով` կառավարությունը որոշել է փոխհատուցել նրանց ուսման վարձը: Հիմնական արժանիքն, իհարկե, Հայրենիքի սահմանները պաշտպանելն է: Բացի այդ Էդգարն անցյալ տարի նաև տանկային միջազգային բիաթլոնում է բարձր պահել հայրենի բանակի պատիվը:

Эдгар Мнацаканян
© Sputnik / Arpi Beglaryan
Էդգար Մնացականյան

«2015թ-ին ծառայության ընթացքում Ռուսաստանում մասնակցել եմ տանկային միջազգային բիաթլոնի, պարգևատրվել եմ որպես լավագույն նշանառու օպերատոր»,- պատմում է Էդգար Մնացականյանը:

Բժշկական համալսարանի առաջին կուրսի ուսանողուհի Ելենա Թաթոսյանի դեպքում էլ դիմումը դիտարկելիս Երիտասարդական հիմնադրամը հաշվի է առել նրա բարձր առաջադիմությունն ու ակտիվ մասնակցությունը գիտակրթական ծրագրերին և ուսանողական խորհրդի նախաձեռնություններին:

Елена Бабаян
© Sputnik / Asatur Yesayants
Ելենա Թաթոսյան

Արժանի ուսանողներին խրախուսելուն զուգահեռ կառավարությունը փորձում է նաև աջակցել սոցիալական խնդիրներ ունեցող ընտանիքների ուսանողներին, որպեսզի նրանք վճարովի համակարգ ընդունվելու դեպքում չզրկվեն գիտելիք ստանալու իրավունքից: Բժշկական համալսարանի դահլիճում Հայաստանի երիտասարդական հիմնադրամի կողմից այս տարի ընտրված 794 ուսանողներին ուսման վարձի փոխհատուցման հավաստագրերի հանձնման արարողության ժամանակ այդ մասին նշեց ՀՀ վարչապետ Հովիկ Աբրահամյանը:

«Կառավարությունն ապագա սերնդին աջակցելու է բոլոր հարթակներում: Եթե նկատել եք, մենք արդեն կառավարությունում ունենք երիտասարդ կադրեր, և փորձում ենք բոլոր մակարդակներում երիտասարդներին ներգրավել և՛ քաղաքական գործընթացներում, և՛ տնտեսական»,- իր ելույթում ասաց Հովիկ Աբրահամյանը:

Վարչապետը նաև համոզված է, որ Երիտասարդական հիմնադրամը մրցույթի հաղթողներին անաչառ կերպով է ընտրել: Հիմնադրամի նախագահ Կարեն Ավագյանն էլ ուսանողներին հորդորեց ուսումնասիրել ընտրված ուսանողների ցուցակն ու այնտեղ անարժան անուն գտնելու դեպքում դիմել հիմնադրամի ղեկավարությանը: «Մենք անպայման դրանք կքննարկենք», — ասաց նա:

Карен Авагян, Овик Абраамян  и  Левон Мкртчян
© Sputnik / Асатур Есаянц
ՀՀ վարչապետ Հովիկ Աբրահամյան և ԿԳ նախարար Լևոն Մկրտչյան

Հանդիսությանը ներկա կրթության և գիտության նախարար Լևոն Մկրտչյանը ևս դրական գնահատեց Երիտասարդական հիմնադրամի կատարած աշխատանքը՝ հավաստիացնելով, որ այն իսկապես թափանցիկ է եղել, քանի որ ուսանողները քաջատեղյակ են միմյանց թե´ սոցիալական վիճակին, թե´ արժանիքներին և չարաշահում թույլ չեն տա:

 

 

526