Галуст Саакян

ԱԺ նախագահը կարոտել էր լրագրողներին ու պատգամավորներին

7
(Թարմացված է 15:07 22.03.2016)
Ազգային ժողովի նախագահ Գալուստ Սահակյանը վերադարձել է կարճատև արձակուրդից, որի ընթացքում բժշկական հետազոտություն է անցել արտասահմանում

ԵՐԵՎԱՆ, 22 մարտի — Sputnik. Հայաստանի ԱԺ խոսնակ Գալուստ Սահակյանն արդեն աշխատանքի է անցել և լրագրողներին հայտնել, որ պատրաստ է կատարել իր պարտականությունները։

Մարտի 14-ին խորհրդարանի խոսնակը կարճատև արձակուրդ է վերցրել, որպեսզի բուժզննում անցնի արտասահմանյան հիվանդանոցներից մեկում։ 68-ամյա Գալուստ Սահակյանի առողջությունը վատացել էր փետրվարի 17-ին, ինչից հետո նա ամբուլատոր բուժում էր անցել, և նրա մոտ  գլխուղեղի արյան շրջանառության անցողիկ խանգարում էին հայտնաբերել։

«Բնականաբար, և՛ լրագրողներին, և՛ պատգամավորներին, ամեն ինչն էլ կարոտել եմ, որովհետև դա տարիներ շարունակ իմ հիմնարար աշխատանքն է եղել», — ասաց Սահակյանը։

Նա անդրադարձավ նաև երկրի ներքաղաքական օրակարգի հիմնական հարցին` նոր Ընտրական օրենսգրքին։ Խոսնակի խոսքով` իշխանությունը փորձում է նախագիծն այնպիսի տեսքի բերել, որ կողմերից ոչ մեկը դժգոհություններ չունենա։

«Լրագրողների մասին, իհարկե, մենք էլ ենք շատ մտածել, կարծեմ հիմա 8 հոգի է գրված, որովհետև Հայաստանում այնպիսի ընտրատեղամաս չկա, որտեղ 30-100 լրագրող կտեղավորվեն: Եթե լրագրողները ճիշտ բան կառաջարկեն, կընդունվի մեր կողմից»,- ասաց ԱԺ նախագահը՝ արձագանքելով տեղամասերում լրագրողների թվի սահմանափակման հարցին:

Քվեարկածների ցուցակների վերաբերյալ էլ Սահակյանն ասաց, որ համաձայն չէ ընդդիմության այն առաջարկին, ըստ որի` քվեացուցակները պետք է հրապարակվեն։

«Ես այդ դրույթի մեջ ճիշտ բան չեմ տեսնում, բայց թող առաջարկեն: Կփորձենք ինչ-որ ձևով պատասխանել»,- ասաց նա։

 

7