Взрыв в Брюссельском метро

Հայ պատգամավորները դեռ չգիտեն` ինչպես են վերադառնալու Բրյուսելից

70
(Թարմացված է 15:44 22.03.2016)
Բրյուսելում գտնվող հայ պատգամավորներն այս պահին անվտանգության մեջ են։ Sputnik Արմենիա պորտալի թղթակցի հետ զրույցում Թևան Պողոսյանը պատմեց այն մասին, թե ինչ իրավիճակ է տիրում քաղաքում, երբ և ինչպես են մեր խորհրդարանականները վերադառնալու հայրենիք

ԵՐԵՎԱՆ, 22 մարտի — Sputnik, Լաուրա Սարգսյան. Բելգիայի մայրաքաղաք Բրյուսելում ահաբեկչությունների շարք է գրանցվել։ Երկու պայթյուն է որոտացել օդանավակայանում, ևս երկուսը` մետրոյում։

Պատվիրակության կազմում են Արտակ Զաքարյանը, Հրանտ Բագրատյանը, Վահե Էնֆիաջյանը, Շուշան Պետրոսյանը, Կարինե Աճեմյանը, Մհեր Շահգելդյանը: Նրանք մասնակցում են Եվրանեսթ Խորհրդարանական վեհաժողովին, որը մեկնարկել է Բրյուսելում մարտի 21-ին և կավարտվի մարտի 23-ին։

Դեռ հայտնի չէ, թե խորհրդարանի անդամներն ինչպես են վերադառնալու հայրենիք։

«Մենք պետք է Երևան վերադառնայինք մարտի 24-ին, սակայն դեռ պարզ չէ` ինչպես և երբ կկարողանանք վերադառնալ։ Այժմ մենք պատվիրակության անդամներով գնում ենք Բրյուսելի խորհրդարան։ Արտակ Զաքարյանն ու մի քանի քարտուղարներ արդեն այնտեղ են։ Քաղաքում խուճապ է, ամենուրեք անվտանգության մարմինների ավտոմեքենաներ են։ Երկնքում ուղղաթիռներ են պտտվում։ Հատուկ ծառայությունները փորձում են անվտանգություն ապահովել», — ասաց ԱԺ «Ժառանգություն» խմբակցության քարտուղար Թևան Պողոսյանը։

Նա նաև ավելացրեց, որ մի քանի ժամ անց պարզ կլինի, թե իրենք երբ կվերադառնան հայրենիք։

 

70