Вид из самолета

«Armenia». հայկական ավիացիայի հաղթանա՞կը, թե՞ պարտությունը

144
(Թարմացված է 19:28 12.03.2016)
Հայկական ավիաշուկայում նոր խաղացող է հայտնվել` «Armenia» ավիաընկերությունը, որը հավակնում է ազգային փոխադրող դառնալ: Սակայն փորձագետները կարծում են, որ այդ նախագիծը, ինչպես և ավիացիոն ոլորտի մի շարք այլ նախաձեռնություններ, կձախողվի

ԵՐԵՎԱՆ, 12 մարտի — Sputnik, Լաուրա Սարգսյան. «Armenia» նոր ավիաընկերությունը չի կարողանա հայկական օդում երկար գոյատևել, քանի որ ինչպես հայտնվել է չգիտես որտեղից, այդպես էլ կանհետանա, կարծում է Հայաստանի քաղավիացիայի գլխավոր վարչության նախկին պետ Շահեն Պետրոսյանը:

Ընկերության բաժնետերերն իրենց հերթին, հակառակը, կարծում են, որ բարդ իրավիճակներում գոյատևելու իրենց 23 տարվա փորձը կօգնի ոտքի կանգնեցնել հայկական ավիացիան ու երկար տարիներ մնալ հայկական օդում: Չէ՞ որ «Armenia» —ն ստեղծելու գաղափարն առաջացել է դեռ մի քանի տարի առաջ, և այս նոր ընկերությանն աջակցում է Հայաստանի կառավարությունը: Պաշտոնապես «Արմենիա» ավիաընկերության հիմնադիրներն են Աշոտ Թորոսյանը (51% բաժնետոմս), Թամազ Գաիաշվիլին (24%) և Ռոբերտ Հովհաննիսյանը (25%):

Սակայն «նորեկների» այս հայտարարությունները հայկական ավիաշուկայում տեղի փորձագետներին չեն ոգևորում: Կամ հայ հասարակությունը պարզապես հոգնել է այդ ոլորտում Հայաստանի ունեցած մշտական անհաջողություններից, կամ էլ այստեղ «ցանկացած նոր բան դժվարությամբ է ընկալվում» հոգեբանական գործոնն է աշխատում:

«Նրանք վստահություն չեն ներշնչում: Նրանք նույնիսկ սեփական ավիապարկը չունեն, և ո՞վ է ինքնաթիռների համար պատասխան տալու: Հիշենք Երևան-Սոչի ավիաչվերթը, երբ «Արմավիայի» ինքնաթիռը վթարի ենթարկվեց: Ամբողջ մեղքը բարդեցին օդաչուի վրա ու գործը փակեցին», — ասաց Պետրոսյանը:

Ավելի վաղ «Արմենիա» ընկերությունը հայտարարել էր, որ հիմնական պարկում կլինեն «Բոինգ» տեսակի ինքնաթիռներ (737-700, 737-800, 737-500): Ապրիլին ավիաընկերության հաշվեկշռում լիզինգով վերցված երեք ինքնաթիռ կլինի: Հունիս-հուլիսին պարկը կհամալրվի ևս երկու օդանավով, իսկ տարեվերջին արդեն համալրված կլինի ութ ինքնաթիռով:

ՔԱԳՎ նախկին ղեկավարը հիշեցրեց, որ ժամանակին նա առաջարկում էր ավիաընկերություն ստեղծել 3-4 ինքնաթիռով, այդ դեպքում ծախսերը կկազմեին 50 մլն դոլար:

«Սկզբի համար այս գումարը բավարար էր: Ու եթե ավիաընկերությունը վառելիքը ձեռք բերի մատչելի գներով, այլ ոչ թե այն սպեկուլյացիոն գներով, որն առաջարկում է «Զվարթնոց» օդանավակայանը, ապա Երևանից Եվրոպա տոմսերը մոտ 400 դոլար կարժենան, Մոսկվա` 200 դոլար, Թեհրան` 150 դոլար», — ասաց Պետրոսյանը:

Նա նաև կարծում է, որ այդ ժամանակ հնարավոր կլիներ մտածել լոուքոսթերի մասին, որը չվերթեր պետք է իրականացնի Գյումրու օդանավակայանից:

Փորձագետի կարծիքով` Հայաստանը պետք է հրաժարվի նաև «բաց երկնքի» ձախողված քաղաքականությունից, որը ոչ մի լավ բանի չի հանգեցրել:

«Բաց երկնքի քաղաքականությունը բլեֆ է: Այն կարող է գործել միայն այն դեպքում, երբ դու մի քանի երկրների հետ մեկ դաշինքի մեջ ես, այնպես, ինչպես դա իրականացվում է ԵՄ-ում: Ես առաջարկում եմ նման դաշինք կազմել Վրաստանի, Ուկրաինայի, Իրանի հետ և միայն հետո նման քաղաքականություն իրականացնել», — ասաց Պետրոսյանը:

Նշենք, որ ավելի վաղ «բաց երկնքի» քաղաքականության վերաբերյալ կասկածով էր խոսում նաև Հայաստանի նոր ավիափոխադրող ընկերության տնօրեն Թամազ Գաիաշվիլին: Նա առաջարկում էր յուրաքանչյուր երկրի հետ համագործակցել երկկողմ պայմանավորվածության համաձայն:

Պետրոսյանը նաև նշեց այն փաստը, որ հենց ԶԼՄ-ներում հայտնվեց նոր ավիափոխադրողի մասին տեղեկատվությունը, հորիզոնում ռուսական «Պոբեդա» լոուքոսթերը հայտնվեց: Սա փորձագետին հիշեցրեց «Աերոֆլոտի» ու «Արմավիայի» պատմությունը: Վերջինը, չդիմանալով մրցակցությանը, սնանկացավ:

Самолет российской авиакомпании Победа
© Sputnik / Сергей Пивоваров
Հայաստանը զրկվեց ազգային ավիափոխադրողից 2013 թվականին «Արմավիա» ընկերության սնանկացումից հետո: Հայաստանի ավիաշուկայում հայտնվեց Air Armenia ընկերությունը, որը սակայն 2014 թվականի հոկտեմբերին սնանկացավ ու դադարեցրեց ավիափոխադրումները:

Air Armenia-ի անհաջողության պատճառներից մեկը համարվեց այն, որ Հայաստանի ավիաշուկայում գերիշխող ռուսական ավիաընկերությունների ֆոնին ընկերությունը չդիմացավ մրցակցությանը։

 

 

 

144