РАЗВЕДЧИКИ ТРЕНИРОВКА

Սադրիչ գործողություն կանխելով` զինվորը հոգեբանորեն կայունանում է

69
Հայկական բանակի զինծառայողները ֆիզիկականից ավելի կարևորում են մարտական ոգին։ Ինչպես համոզվեց Sputnik Արմենիայի թղթակիցը, զրուցելով հատուկջոկատայինների հետ, հենց երիտասարդ բանակի երիտասարդ զինվորների մարտական ոգին է անառիկ պահում Հայաստանի սահմանները

ԵՐԵՎԱՆ, 28 հունվարի — Sputnik. Հայոց բանակի օրվա կապակցությամբ Sputnik Արմենիայի թղթակիցը հանդիպեց հատուկջոկատայինների հետ և հպարտության ու երախտագիտության զգացումով լցվեց երիտասարդ այդ տղաների նկատմամբ, ովքեր գիշեր ու զօր պաշտպանում են մեր հայրենիքի սահմաններն ու երերուն խաղաղությունը:

«Պայքարում ամենաառաջինը մարտական ոգին է, յուրաքանչյուր զինվոր գիտի, թե ինչի համար է կռվում, ինչու է այստեղ։ Մեր առավելությունն այն է, որ յուրաքանչյուր զինվորի մարտական ոգին շատ բարձր է, իսկ հակառակորդը չունի այդ առավելությունը մեր նկատմամբ»,- ասաց զինծառայող, մասնագիտությամբ իրավաբան Հրանտը։

Նա ավելացրեց, որ եկել է իր Հայրենիքը, հողը, ընտանիքը, տունը պաշտպանելու։ Նա հպարտությամբ նշեց, որ իր զինակից ընկերներն ուժեղ են ու խելացի։

«Մեզ համար միևնույն է, թե հակառակորդը տեխնիկապես ինչքան է հզոր։ Կարևորը մարտական ոգին է, և որ մարդը չթերագնահատի իրեն։ Հակառակորդն այսօր տեխնիկա ունի, բայց ոգի չունի»,- ավելացրեց մեկ այլ զինծառայող` Արմանը։

Իսկ Կարենի մտահոգության առարկան իրենց բոլորի ծնողներն են։

«Զինվորների ծնողներին մաղթում եմ համբերություն։ Քանի որ իրենց երեխան իրենց կողքին չէ, անհանգստանում են նրա համար։ Բայց թող համբերեն ու հանգիստ լինեն։ Այստեղ այնքան վտանգավոր չէ, որքան թվում է առաջին հայացքից»,- բոլոր զինվորների ծնողներին դիմեց նա ու հավելեց, որ սադրիչ գործողությունները կանխելուց հետո զինվորի հոգեբանությունն ավելի է կայունանում։

Իսկ Դավթի ցանկությունն էր, որ պատերազմ չլինի, որովհետև դա ոչ ոքի օգուտ չի բերի։

Sputnik Արմենիան շնորհավորում է Հայոց բանակի բոլոր զինվորներին ու մաղթում խաղաղություն։

 

 

69