Арама 30

Արամի 30-ը քանդելու գիշերային «օպերացիան»

235
Արամի 30 հասցեում գտնվող հին շենքի քանդումը հասարակության վրդովմունքի պատճառ է դարձել, սեփականատերը պնդում է, որ դա իր բիզնես ծրագրերում չի եղել

ԵՐԵՎԱՆ, 22 հունվարի- Sputnik. Երևանի փոքր կենտրոնում իրականացվող վերակառուցման ծրագիրը, որով նախատեսվել է քանդել Արամի 30 հասցեում գտնվող շենքը, շուրջ 10 տարվա պատմություն ունի, լրագրողներին ասաց այդ հատվածի սեփականատեր Ավո Քարագոզյանը:

Հունվարի 17-ի լույս 18-ի գիշերը Երևանի Հանրապետության հրապարակի մոտ՝ Արամի և Աբովյան փողոցներում խաչմերուկում, քանդվել է հին շենքերից մեկը: Քանդելու «օպերացիան» իրականացվել է գիշերը, որպեսզի ակտիվիստները խնդիրներ չառաջացնեն:

Քարագոզյանը հայտնեց, որ 2004թ.-ին մինչև Աբովյան-Արամի-Նալբանդյան փողոցների միջև գտնվող հատվածը գնելը նա տեսել է այդ տարածքի վերակառուցման հաստատված ծրագիրը, որտեղ Արամի 30-ի շենքը քանդման ենթակա է եղել:

Հենց այդ հատվածի կառուցումը, որը ձեռք է բերվել 2010-2011թթ.-ին 500 հազար դոլարով, սեփականատիրոջ բիզնես ծրագրերի մեջ չի մտել:

«Կոնկրետ այդ շենքը քանդելը պետք չէր հյուրանոցի շինարարության համար»,- ասաց սեփականատերը` նշելով, որ այդ տարածքը նա հանձնում է քաղաքապետարանին՝ Արամի փողոցը լայնացնելու համար:

Ճարտարապետ Աշոտ Ալեքսանյանը կարծում է, որ ներկա պահին Արամի փողոցը շատ նեղ է և լայնացման կարիք ունի:

«Այն պետք է թեթևացնի Հանրապետության հրապարկի տրանսպորտային իրավիճակը: Հրապարակը պետք է թեթևացնել, իսկ դա միակ ուղին է»,- ասաց Ալեքսանյանը:

Ճարտարապետը պնդում է, որ Արամի 30-ի շենքը քանդելու հաշվին կլայնանա ոչ միայն փողոցը, այլ նաև Ազգային պատկերասրահի հարակից մայթը։

Նրա խոսքով՝ մի քանի մետրով կլայնանա նաև Աբովյան փողոցը, որից հետո Հյուսիսային պողոտայի և Հանրապետության հրապարակի հատման վայրում կստեղծվի ազատ գոտի, որտեղ նաև պուրակ է լինելու:

Սակայն շատերը դեմ են, որ Երևանի հին շենքերը քանդվեն: Շատ ճարտարապետներ, այդ թվում՝ Ճարտարապետների միության նախագահ Մկրտիչ Մինասյանը, կարծում են, որ այդ նախագիծը չի եղել Ալեքսանդր Թամանյանի` Երևանի գլխավոր հատակագծի սկզբնական մտահաղացման մեջ: Նրանք պնդում են, որ մայրաքաղաքը կորցնում է իր մշակութային տեսքը:

 

235