Открытие нового автовокзала Восточный в Казани

Ուժեղ ցիկլոնը ցնցում է մարդու օրգանիզմը

601
Առաջիկա մեկ շաբաթվա ընթացքում եղանակը կտրուկ ցրտելու է: Սրտաբան Մարինա Օրդյանը Sputnik միջազգային մամուլի ակումբում խրոնիկ հիվանդներին զգուշացրեց, թե ինչ առողջական խնդիրներ կարող են ի հայտ գալ եղանակային կտրուկ փոփոխությունների հետևանքով

ԵՐԵՎԱՆ, 22 հունվարի-Sputnik, Գոհար Սարգսյան. Անձրև, ձյուն, ջերմաստիճանի կտրուկ անկում, մինչև 26 աստիճան ցուրտ: Խրոնիկ հիվանդություններ ունեցող մարդիկ առաջինը մտածում են ոչ թե տունը տաքացնելու, այլ առողջության մասին:

Կարինե տատիկը ճնշման ապարատը ձեռքն է առնում, երբ եղանակային փոփոխություն է զգում: Ճնշման բարձրացում, սրտխառնոց ու գլխապտույտ. եղանակային փոփոխություններին ուղեկցող ախտանշաններն են:

«Դեղերս տանը շարած են: Բայց բժիշկներն ասել են նաև, որ պետք է շատ զբոսնեմ, որ կոփվեմ»,-ասաց Կարինե տատիկը:

Այն, որ եղանակային կտրուկ փոփոխություններից տուժում են սրտանոթային, շնչառական ու հենաշարժական խնդիրներ ունեցող մարդիկ, նկատել էր դեռևս Հիպոկրատը: Նման հիվանդների օրգանիզմը չի ադապտացվում եղանակի ստեղծած անակնկալներին:

«Ձմռանն անգամ մեկ աստիճանով ջերմաստիճանի անկումն ավելացնում է ինսուլտների ու ինֆարկտների քանակը գրեթե 2 անգամ: Ձմեռային եռամսյակում սրտանոթային հիվանդություններից մահվան ցուցանիշներն ավելի մեծ են»,-ասաց Մարինա Օրդյանը:

Марине Ордян
© Sputnik / Гоар Саргсян
Մարինե Օրդյան

Եղանակային պայմանները կարող են ազդել նաև առողջ մարդկանց վրա: Պարզվում է՝ տղամարդկանց 1/3-ը և կանանց 1/2-ը եղանակային կախվածություն ունեն, այսինքն՝ նրանց տրամադրությունն ու առողջությունը կախված են եղանակից:

«Մարդու վրա միաժամանակ կարող է ազդել ջերմաստիճանի նվազումը, ցիկլոնի ժամանակ օդի մեջ դիտվող թթվածնի քանակի պակասը և այլն: Խորհուրդս ֆիզիկական ու էմոցիոնալ ծանրաբեռնվածությունից խուսափելն է, հաճախակի զբոսնելն ու առողջ սնվելն է»,-ասաց սրտաբանը:

Առողջական նշված խնդիրները սովորաբար գլուխ են բարձրանում միայն կտրուկ փոփոխությունների ժամանակ: Մարինա Օրդյանը վստահեցնում է, որ թեթևակի տատանումները կարող են յուրովի մարզել օրգանիզմը, և սրտաբանը նույնիսկ դրանց անվանում է տվել` «եղանակային թրեյնինգ»:

 

601