ԵՐԵՎԱՆ, 10 հունվարի-Sputnik, Գոհար Սարգսյան. Վերջին տասնամյակների ընթացքում Հայաստանը նման ձմեռ չէր տեսել, երբ առատ ձյուն տեղաց 4 օր անընդմեջ, իսկ փրկարարական ուժերը տարվա առաջին մեկ շաբաթում այնքան աշխատանք կատարեցին, որքան նախորդ տարվա վերջին 4 ամսում:
Անդադար տեղացող ձյան պայմաններում արգելափակված ճանապարհին վարորդը վախենում էր բացել մեքենայի դուռը, քանի որ տեսանելիության բացակայության պատճառով կարող էր ոտքը դուրս հանել ու ճանապարհի հատվածից դուրս հայտնվել: Մեկ այլ քաղաքացու մեքենայի վառելիքն էր վերջանում, և նա կարող էր մնալ ճանապարհին ու պարզապես սառչել: Սա հատված չէ արկածային ֆիլմից, այլ՝ հայկական ձմռան մատուցած իրականությունը:
«Տարվա առաջին օրերի ընթացքում անվտանգ տարածք ենք դուրս բերել 1240 տրանսպորտային միջոց և ձնաբքից փրկել ենք շուրջ 3100 մարդու»,-ասում է ՏԿԱԻՆ-ի ճգնաժամային կառավարման կենտրոնի պետ Հովհաննես Խանգելդյանը: Սպասվող եղանակին ընդառաջ մեր զրուցակիցը հատկապես մարզերի բնակիչներին խորհուրդ է տալիս տնից դուրս գալուց առաջ անպայման ճշտել ճանապարհների վիճակը: Ձնառատ եղանակին առավել վտանգավոր է Սոթք-Քարվաճառ, Բերդ-Ճամբարակ ավտոճանապարհները, Վարդենյաց լեռնանցքը և բոլոր բարձրադիր ճանապարհները:
Օրինակ այսօր՝ հունվարի 10-ին, ահազանգ է ստացվել, որ Սյունիքի մարզի Գեղանուշ գյուղի մոտակայքում «Ուազ» մակնիշի մեքենան արգելափակվել է ձյան մեջ: Մեքենան դուրս բերելու համար դեպքի վայր է մեկնել փրկարարների օպերատիվ խումբը: «Հաճախ արգելափակված ճանապարհներին հայտնված քաղաքացիների նյարդերը տեղի են տալիս, և նրանք խոչընդոտում են փրկարարների աշխատանքը: Մենք այդ ամենին ըմբռնումով ենք մոտենում, բայց պետք է հասկանալ նաև փրկարարներին: Ամանորին օգնությունը ժամանակին հասցնելու համար պետությունը ֆանտաստիկ չափերի հասնող ծախսեր է իրականացրել»,-ասում է Հովհաննես Խանգելդյանը:
Նա հայրենակիցներին կոչ է անում հետևել ջրագծերին.
«Կարող են առաջանալ ջեռուցման հետ կապված խնդիրներ, դեպքերը շատ են, երբ ջրագծերը սառչում են և պայթում, պետք է հաճախակի ծորակները ստուգել և թողնել, որ ջուրը հոսի: Խնդիրներ ունենում են հատկապես այն քաղաքացիները, ովքեր մի քանի օրով բացակայում են տնից»:
Ամանորի ձնառատ օրերին փրկարարներին դիմել են տարբեր հարցերով՝ թե՛ ճակատագրական, թե՛ զավեշտալի, սակայն ամենահուզիչ դրվագները ծննդկանների հետ են կապված: Այդ օրերին փրկարարներն ինը ծննդկանի օգնել են հաղթահարել անանցանելի ճանապարհները և նրանց հասցրել ծննդատուն: Այսպիսով 9-ը փոքրիկ հրաշք բարեհաջող կերպով լույս աշխարհ է եկել ապահով պայմաններում:
