ԵՐԵՎԱՆ, 9 հունվարի — Sputnik. ՀՀ ՊՆ մամուլի քարտուղար, ռազմական փորձագետ Արծրուն Հովհաննիսյանը Sputnik Արմենիա ռադիոկայանի եթերում խոսել է այն մասին, թե ինչ տարբերություն կա ջրածնային ռումբի և ատոմային ռումբի միջև:
«Ջրածնային ռումբը միջուկային ռումբ է: Ատոմայինից տարբերվում է նրանով, որ շատ ավելի հզոր է: Կոպիտ բացատրություն կա, որ ջրածնային ռումբի համար որպես պայթուցիչ հանդես է գալիս ատոմային ռումբը: Ըստ էության, ջրածնային ռումբի տարբերությունը հզորությունն է, հետագա ազդեցությունը՝ ռադիացիան և այլն, որոշակի տարբերություններ գուցե ունի, բայց` շատ ավելի հզոր: Վտանգավոր է նրանով, որ եթե մինչ այս խոսվում էր Հյուսիսային Կորեայի ատոմային ռումբը յուրացնել-չյուրացնելու մասին, ապա այսօր ավելի հզոր միջոց են ձեռք բերել»,- ասել է Արծրուն Հովհաննիսյանը:
Նա նշել է, որ խոցման տարածքը խիստ կախված է ռումբի չափերից, միատեսակություն չկա: Համեմատության համար նա նշել է, որ ժամանակին Ճապոնիայի վրա նետված ռումբերը եղել են 20 ու 12 կիլոտոննա, իսկ ժամանակակից ատոմային ռումբերը ավելի մեծ են: Դրանով է որոշվում գործողության շառավիղը: Ամենափոքրը՝ 20 կիլոտոննա ռումբը, կարող է մի քանի հարյուր քկմ տարածք ընդհանրապես ամայացնել մի քանի հարյուր տարով:
Նա նաև նշել է, որ ջրածնային ռումբի թեման, որպես այդպիսին, համարվում է փակված, որովհետև Սառը պատերազմի տարիների փորձարկումները ցույց են տվել, որ ծախսերն ու արդյունավետությունը այնքան էլ արդարացված չեն ջրածնային ռումբի դեպքում:
«Այն առաջինը փորձարկեց ԱՄՆ-ն, հետագայում նույն ճանապարհով գնաց ԽՍՀՄ-ը, հասավ որոշակի գագաթնակետի, խոսվում էր աբսուրդի հասնող 100 մեգատոննայի մասին: Փորձագետները հաշվարկել էին, որ 100 մեգատոննա մեկ ռումբը կարող է ամբողջ Մեծ Բրիտանիան խորտակել: Բայց հետագայում նման պետությունները հետ կանգնեցին ջրածնային տեխնոլոգիաներից: Ավելի կենտրոնացան ատոմայինի վրա՝ փորձելով չափերը փոքրացնել, իսկ հզորությունը՝ բարձրացնել: Այսօր պաշտոնապես որևէ պետություն իր զինանոցում չի պահում ջրածնային ռումբ: Ավելի արդյունավետ է ունենալ հզոր միջուկային ատոմային ռումբ»,- ասել է Հովհաննիսյանը:
ԶԼՄ-ները հայտնում են, որ հյուսիսկորեական ռումբի փորձարկման հետևանքով 5,1 մագնիտուդ հզորությամբ երկրաշարժ է տեղի ունեցել:
