Производство игрушек в Армении. Куклы Арам и Ануш

Տոներն են մոտենում. «ճիշտ» խաղալիքներ երեխաներին

505
(Թարմացված է 10:41 27.12.2015)
Ամանորին ընդառաջ խաղալիքների խանութների դարակները րոպե առ րոպե դատարկվում են: Այս օրերին ծնողներն անցնում մի խանութից մյուսը երեխայի` երբեմն անհավանական ցանկություններն իրականացնելու համար: Sputnik Արմենիան կհուշի` ինչ խաղալիք գնել երեխայի համար, որ անվտանգ ու օգտակար լինի

Գոհար Սարգսյան, Sputnik

«Made in Armenia» կամ «Պատրաստված է Հայաստանում»: Մեր երկրում արդեն սկսել են գնել հենց հայկական արտադրության խաղալիքներ, ընդ որում` դրանք որակապես չեն զիջում արտասահմանում արտադրվածներին:

«Հայկական խաղալիքները պատրաստված են որակյալ ներկերով ու կարված են պինդ թելերով: Բայց առավել կարևոր է, որ խաղալիքները «խոսում են» հայերեն և ունեն հայկական անուններ: Վառ օրինակ են Արամիկն ու Անուշիկը, որոնք երեխաների հետ ընկերանում են, սովորում հաշվել ու տարբեր բառեր արտաբերել»,-ասում է հայկական խաղալիքներ արտադրող ընկերություններից մեկի տնօրենը:

Արամիկն ու Անուշիկը մի քանի րոպեում «գեղեցկացան ու շունչ առան» մեր աչքի առջև: Ահա թե ինչպես է ընթանում արտադրական պրոցեսը:

Sputnik Արմենիան հետաքրքրվեց, թե հայկական որ մուլտհերոսներն են խաղալիքների վերածվել: Պարզվում է` կամ հայկական մուլտֆիլմերն են քիչ, կամ էլ դրանց պահանջարկն ու առաջարկը չկա: Սասունցի Դավթի կերպարով խաղալիք ստեղծելու` Sputnik Արմենիայի միտքն, օրինակ, զարմացրեց արտադրողին, քանի որ առաջին անգամ էր նման առաջարկ ստանում:

Մեր տեղեկություններով` հայ փոքրիկները շատ են հետաքրքրված սարսափազդու տեսքով խաղալիքներով, ինչը լավ միտում չէ. չէ՞ որ երեխաների մոտ աշխարհընկալումը սկսվում է նաև խաղալիքներով:

Игрушки. Халк
© Sputnik/ Асатур Есаянц
Խաղալիքներ

«Խաղալիքը չպետք է վախեցնի երեխային։ Այժմ եթերը ողողված է վախեցնող մուլտհերոսներով: Երեխաների վրա դրանք կարող են բացասաբար անդրադառնալ: Նման խնդրով այցելուներ ունեցել եմ, իսկ դա արտահայտվում է հետևյալ կերպ` քնի խանգարում, գիշերային մղձավանջներ…Պետք է երեխաներին նվիրել այնպիսի խաղալիքներ, որոնք մոտ են իրական կերպարներին: Օրինակ` մինչև 10 տարեկան երեխային չարժե գնել մարմնի ընդգծված կազմվածք ունեցող տիկնիկ»,-ասում է հոգեբան Իրինա Խանամիրյանը:

Խորհուրդ չի տրվում գնել չափազանց աղմկոտ խաղալիքներ: Դրանք կարող են վնասել երեխայի զգայուն ականջը: Ավելի փոքր երեխաների համար խաղալիք գնելիս պետք է ուշադիր լինել, որ այն սուր եզրեր չունենա, որովհետև խաղալիս փոքրիկը կարող է վնասել իրեն:

«Ծնողներ կան` մտնում են խանութ ու վերցնում տարիքին ոչ համապատասխան խաղալիք: Օրինակ` նուրբ դետալներով խաղալիքը տալիս են 2 տարեկան երեխային ու հետո դժգոհում` որակը վատն էր, կոտրվեց»,-ասում է մանկական խանութ-սրահներից մեկի աշխատակից Հասմիկը:

Производство игрушек в Армении
© Sputnik/ Асатур Есаянц
Խաղալիքների արտադրությունը Հայաստանում

Խորհուրդ չի տրվում խաղալիք գնել շուկայից, քանի որ այնտեղ հիմնականում չեն տրամադրում հավաստագիր կամ որակը հաստատող այլ փաստաթուղթ: Միայն դրանց առկայության դեպքում կարելի է վստահ լինել, որ ստուգված է խաղալիքում թունավոր նյութերի առկայությունը` կապար, մկնդեղ, սնդիկ և այլն:

Ամփոփելով` մասնագետները ծնողներին խորհուրդ են տալիս «որոշ դեպքերում էլ մերժել երեխային, եթե դա չի կոտրում նրանց կամային հատկանիշներն ու բխում է անվտանգության նկատառումներից»:

 

 

505