ԵՐԵՎԱՆ, 23 դեկտեմբերի- Sputnik, Լաուրա Սարգսյան. Հայ փորձագետները ընձառյուծների պահպանման իրենց փորձն են ներկայացրել ռուս գործընկերներին։
Ծրագրի մասնակիցների առաջին հանդիպումը տեղի է ունեցել անցած շաբաթ Կրասնոդարում։
Ընձառյուծների անհետացման խնդիրն արդիական է ինչպես Ռուսաստանի, այնպես էլ Հայաստանի համար։ Ընձառյուծների պահպանման և պաշտպանության ծրագիրը ստեղծվել է դեռ 1972թ.-ին։ Այսօր Հայաստանի տարածքում շուրջ հինգ վայրի կատու կա։
«Քանի որ մենք արդենք ընձառյուծների պահպանման փորձ ունենք, ապա պայմանավորվել ենք, որ մեր գործընկերներին կօգնենք այդ հարցում»,- Sputnik Արմենիայի հետ զրույցում ասաց ծրագրի մասնակից, անկախ լրագրող Նարինե Կիրակոսյանը։
Առաջավորասիական ընձառյուծի անհետացման խնդիրը Ռուսաստանում բարձրացել է դեռ 100 տարի առաջ։ Նրանց պահպանման ծրագրի շրջանակում, որը Ռուսաստանում մեկնարկել է 2006թ.-ին, Սոչի քաղաքի Ազգային պարկ են տարվել ընձառյուծներ Թուրքմենստանից, Ֆրանսիայից և Իրանից։
Ինչպես պատմեց Կիրակոսյանը Sputnik Արմենիայի հետ զրույցում, կենդանիներին ազատ կարձակեն Կրասնոդարի երկրամասի Պսեբայ ավանում։
«Արբանյակի օգնությամբ ընձառյուծների վզակապերի միջոցով կհետևեն նրանց, և եթե կենդանիներից մեկը վտանգի մեջ լինի, նրան կօգնի հատուկ թիմը»,- ասաց նա։
Նախագծի համաձայն, լրագրողներն ազդարարների առաքելություն են ստանձնել` մարդկանց տեղեկացնել, որ ընձառյուծները կարևոր և ոչ վտանգավոր կենդանիներ են։ Կազմակերպիչները համոզված են, որ դա կնպաստի վայրի կենդանիների նկատմամբ ձևավորված վերաբերմունքի փոփոխությանը և նրանց Կովկաս վերադարձնելուն։
«Ի սկզբանե ձևաչափը պետք է եռակողմ լիներ` Ադրբեջանի մասնակցությամբ։ Բայց մեզ համար անհասկանալի պատճառներով վերջին պահին նրանք հրաժարվեցին։ Մենք հուսով ենք, որ Ադրբեջանն ամեն դեպքում կմիանա մեզ»,- նշում է Կիրակոսյանը։
Թեև Վրաստանն ընդգրկված չէ ծրագրում, այնուամենայնիվ Հայաստանը հարևան երկրի հետ համագործակցում է Դիլիջանի անտառներում եղջերուների քանակի ավելացման ծրագրի շրջանակում։ Վրացական կողմը պետք է եղջերուների առանձնյակներ տա Հայաստանին, իսկ Հայաստանը` բեզոարյան այծեր Վրաստանին։
