Встреча президентов Армении и Азербайджана Сержа Саргсяна и Ильхама Алиева

Սարգսյան-Ալիև առանձնազրույցը մեկ ժամից շատ տևեց

88
(Թարմացված է 15:49 19.12.2015)
ՀՀ նախագահ Սերժ Սարգսյանի և Ադրբեջանի նախագահ Իլհամ Ալիևի առանձնազրույցը տևել է մեկ ժամից ավելի: Այս մասին թվիթերյան իր միկրոբլոգում գրել է ԵԱՀԿ Մինսկի խմբի ամերիկացի համանախագահ Ջեյմս Ուորլիքը

ԵՐԵՎԱՆ, 19 դեկտեմբերի — Sputnik. ՀՀ նախագահի մամուլի խոսնակ Վլադիմիր Հակոբյանն էլ իր հերթին թվիթերյան միկրոբլոգում գրել է, որ ՀՀ նախագահը մեկնեց շվեյցարական կառավարության «Լանդգութ Լոհն» ընդունելությունների տանից։ Նախագահների առանձնազրույցից հետո ներս են հրավիրվել համանախագահներն ու արտգործնախարարները:

Հիշեցնենք, որ հանդիպումը սկսվել էր ԵԱՀԿ Մինսկի խմբի համանախագահներ Իգոր Պոպովի (Ռուսաստան), Ջեյմս Ուորլիքի (ԱՄՆ), Պիեռ Անդրիոյի (Ֆրանսիա) և ԵԱՀԿ գործող նախագահի անձնական ներկայացուցիչ Անջեյ Կասպրչիկի մասնակցությամբ, որից հետո ընթացել է առանց միջնորդների:
Սա Սերժ Սարգսյանի ու Իլհամ Ալիևի այս տարվա առաջին հանդիպումն է։

Նախօրերին պաշտոնական Երևանը խստորեն դատապարտել էր Ադրբեջանի կողմից Ղարաբաղի հետ շփման գծում բազմաթիվ մարդկային զոհերի պատճառ դարձած իրավիճակի աննախադեպ սրումը:

ՀՀ ԱԳ նախարար Էդվարդ Նալբանդյանն ընդգծել էր, որ այս իրավիճակում հրամայական է դառնում լարվածության նվազեցմանն ուղղված հստակ քայլերը՝ եռանախագահների կողմից առաջարկվող՝ միջադեպերի հետաքննության մեխանիզմի ստեղծումը, ԵԱՀԿ գործող նախագահի անձնական ներկայացուցչի դիտորդական առաքելության ամրապնդումը, նրա դաշտային օգնականների թվի ավելացումը։

«Ակնկալում ենք, որ համանախագահ երկրները գործնական քայլեր կձեռնարկեն այս ուղղությամբ»,- ասել էր ՀՀ արտաքին գերատեսչության ղեկավարը։

 

 

88