ԵՐԵՎԱՆ, 16 դեկտեմբերի — Sputnik. Հայուհիները միշտ հայտնի են եղել իրենց ձեռագործ աշխատանքներով` ասեղնագործ սփռոցներ, ծածկոցներ, շուղերով և հելունով գործված աքսեսուարներ, հագուստ և գունագեղ գորգեր։
Դարեր շարունակ այս վարպետությունը մայրերից անցել է աղջիկներին, տատիկներից` թոռնուհիներին։
«Մետաքսե ճանապարհ» ազգային արվեստի մշակութային կենտրոնում բացված ձեռագործ աշխատանքների նախատոնական տոնավաճառում ներկայացվել են հայուհիների ստեղծագործական մոտեցումներն ու մեծերից ժառանգած վարպետությունը։
Իրենց աշխատանքներն են ներկայացրել Հայաստանի տարբեր անկյուններում ստեղծագործող 25 կանայք։
Գեղատեսիլ զարդանկարները, հայկական մոտիվներով նախշերն ու տեսարանները կյանք են ստացել նրանց ձեռքերում։ Կերամիկայից պատրաստված իրերը, թելերով գործված կտավները, ծառերի ճյուղերից, տերևներից և խոտից պատրաստված ինքնաշեն տիկնիկները փոխանցում են ազգային ոգին։ Հայուհիները գոբելենների, գորգերի կտավների վրա մուլինե թելով արտասովոր նախշեր են պատկերել, որոնք լցված են ներդաշնակությամբ և երաժշտական ռիթմով, ժամանակից և հեթանոսական մշակույթի համադրությամբ։
«Ինձ թվում է` տիկնիկներն իրենք իրենց են ծնվում իմ ձեռքերում։ Գիտե՞ք` ինչ հետաքրքիր է ստացվում. դու մտահաղացում ունես, իսկ տիկնիկը քեզ հուշում է` «ձեռքս մի քիչ բարակ է ստացել, կտոր ավելացրու, «իմ անունն Անուշ կլինի, իսկ իմը` Տաթև»։ Ասես տիկնիկներն են իրենց ստեղծում, այլ ոչ թե ես…»,- պատմում է վարպետ կանանցից մեկը` Թամար Քյոսոյանը և նշում, որ վարպետության դասեր է առել տատիկից։
Այստեղ ցուցադրված են նաև Ջուղայից բերված խաչքարերի նախշերով բարձեր, աչքի են ընկնում ինչպես կրոնական, այնպես էլ ավանդական մոտիվներ։
«Խնդիրն այն է, որ վարպետները միշտ չէ, որ իրենց գործերը ցուցադրելու հնարավորություն ունեն։ Մենք փորձում ենք օգնել նրանց տարածել ազգայինը։ Շատ կարևոր է, որ միջոցառումն անցկացվում է այս մշակութային կենտրոնում, չէ՞ որ զբոսաշրջիկները կարող են տեսնել հայկական բարձր արվեստը և իրենց հետ Հայաստանի մի մասնիկ տանել»,- պատմում է ցուցահանդեսի կազմակերպիչ, «Հանգույց» ժողովրդական արվեստի հիմնադրամի տնօրեն Տաթև Մուրադյանը։
Ստեղծագործելը տարիք չի հարցնում. Այստեղ կտեսնեք ինչպես երիտասարդ, այնպես էլ ավագ սերնդի ներկայացուցիչների ստեղծագործություններ։
Վարպետներից մեկն արդեն փորձում է տարածել իր արվեստը, մյուսները ասեղնագործության հիմունքներ են դասավանդում մարզերում։
«Այն աշխատանքը, ժամանակը և ներուժը, որոնք պետք են այս աշխատանքները ստեղծելու համար, որոշակի գումար արժեն։ Միայն արվեստով կուշտ չես լինի, չէ՞ որ շատերն ապրում են վաճառքից ստացած միջոցներով»,- պատմեց ցուցահանդեսի մասնակից Նունե Աղանոսյանը։
Վերադարձ արմատներին կամ կորցրածի վերստեղծում. երևի հենց այդպես կարելի է բնութագրել այդ ցուցահանդես-վաճառքը, որը ներկայացնում է հայկական ձեռագործ արվեստի ավանդույթները։
