ԵՐԵՎԱՆ, 28 նոյեմբերի – Sputnik. Հայաստանի և հայ արտադրողների առջև նոր հնարավորություններ են բացվել դեպի ռուսական հումքի շուկա ապրանք արտահանելու համար, և այդ հնարավորությունը չպետք է բաց թողնել, Sputnik Արմենիա պորտալին ասաց Հայաստանի գյուղատնտեսության նախարարի առաջին տեղակալ Գրիշա Բաղիյանը։

Ռուսաստանի և Թուրքիայի հարաբերությունները ճգնաժամ են ապրում այն բանից հետո, երբ երեքշաբթի Սիրիայում վթարի ենթարկվեց ռուսական Սու-24 ռմբարկուն։ ՌԴ գյուղատնտեսության նախարար Ալեքսանդր Տկաչովը հայտնեց, որ թուրքական սննդամթերքը կարող է փոխարինվել մերձավոր արտասահմանից ստացվող ապրանքով։ Իսկ Ռուսաստանի կառավարությունը հանձնարարեց Ռոսսելխոզնադզորին` Թուրքիայից գյուղմթերքի ներմուծման նկատմամբ ուժեղացնել վերահսկողությունը։

«Հայաստանը պետք է գրավի ռուսական շուկան և արտահանի հնարավորինս շատ ապրանք և գյուղմթերք։ Ձուկ, միս, միրգ, բանջարեղեն. մենք կարող ենք դեպի Ռուսաստան արտահանել ամեն ինչ», – նշեց Բաղիյանը։

Նա միաժամանակ ավելացրեց, որ ռուսական շուկան հսկայական է, և Հայաստանը չի կարող լիովին ապահովել Ռուսաստանի պահանջարկը։

Բաղիյանը դժվարացավ ասել, թե որքան կկազմի արտահանման ծավալը, քանի որ Ռուսաստանի և Թուրքիայի հարաբերությունները վերջերս են սրվել, և արտահանման ծավալների մեծացման հնարավորությունն առաջացել է միայն այժմ։

Հայրենական ապրանք արտադրողների միության նախագահ Վազգեն Սաֆարյանն իր հերթին նշեց, որ ռուսական շուկան հագեցած է թուրքական արտադրանքով և ապրանքով, հատկապես տրիկոտաժով, և չի կարելի խոսել այն մասին, որ Հայաստանը կարող է փոխարինել թուրքական արտադրողին։

«Պետք է հաշվի առնել, որ Թուրքիայից Ռուսաստան է մատակարարվում թուրինջ և  նարինջ, ինչը մենք չենք կարող ապահովել։ Հայաստանն այս տարի շուրջ 70 հազար տոննա արտադրանք է արտահանել Ռուսաստան, որից 10 հազար տոննա` միայն խաղող», – ավելացրեց Սաֆարյանը։

Ամեն դեպքում, նրա խոսքով, Հայաստանը կարող է Ռուսաստան արտահանել տարեկան շուրջ 100 հազար տոննա գյուղմթերք, սակայն դա ռուսական շուկայի բավականին փոքր տոկոսն է։

«Այդ առումով հազիվ թե կարող ենք վստահաբար ասել, որ եթե թուրքական ապրանքի ու արտադրանքի նկատմամբ արգելք լինի, ապա դեպի Ռուսաստան հայկական մթերքի արտահանումը մի քանի անգամ կմեծանա։ Այդ ամենը կախված չէ Թուրքիայից», – ընդգծեց Սաֆարյանը։

Նրա խոսքերով` հայ ֆերմերներն ու գործարարները կարող են իրացնել այնքան արտադրանք, որքան ունեն։

«Այլ հարց է, եթե մենք կարողանանք որակյալ տրիկոտաժ, հագուստ և կոշիկ արտադրել ռուսական շուկայի համար։ Մենք ունենք գործարան, որը ռուսական կողմի պատվերով կոշիկ է կարում։ Ի դեպ, մեր վարպետները հիանալի կոշիկ են կարում, որը Ռուսաստանում բարձր է գնահատվում։ Ժամանակն է, որ Հայաստանը վերսկսի կոշկակարության ավանդույթը։ Թող Թուրքիան զբաղվի իր խնդիրներով, իսկ մենք պետք է ինքներս գտնենք մեր տեղը», – ավելացրեց Սաֆարյանը։

ԵՐԵՎԱՆ, 3 մարտի - Sputnik. Արմավիրի փոխմարզպետ, պահեստազորի գեներալ–մայոր Ալեքսան Ալեքսանյանը հրաժարվում է պաշտոնից` միանալով Գլխավոր շտաբի` վարչապետ Նիկոլ Փաշինյանի հրաժարականի պահանջին։ Բաղրամյան պողոտայում ընթացող Հայրենիքի փրկության շարժման հանրահավաքի ժամանակ տեղեկությունը հայտնեց ՀՅԴ–ական Գեղամ Մանուկյանը` ընթերցելով Ալեքսանյանի հայտարարությունը։

«Պետության առջև ծառացած մարտահրավերները հանրության համախբման, միասնական դաշտի ստեղծման խնդիր են առաջացրել։ Մինչդեռ երկրի իշխանությունը լծված է հանրությունը բաժանելու և պիտակավորելու գործին։ Որդեգրված այս ուղին անհարիր է մեր ազգին։ Ելնելով ստեղծված իրավիճակից` իմ անհամաձայնությունն եմ հայտնում տեղի ունեցողի վերաբերյալ և հրաժարվում եմ փոխմարզպետի պաշտոնից»,–նշված է Ալեքսանյանի հայտարարության մեջ։

Ալեքսանյանը, միաժամանակ, իր աջակցությունն է հայտնում արժանավոր բոլոր սպաներին և հատկապես իր զինակից ընկերոջը` Օնիկ Գասպարյանին։

Հիշեցնենք, որ մարտի 1-ին էլ հայտնի դարձավ, որ բանակի ստեղծման ակունքներում կանգնած գեներալ-մայոր Հենրիկ Մուրադյանը հեռանում է Գեղարքունիքի մարզպետի աշխարհազորի գծով տեղակալի պաշտոնից` միանալով ԶՈւ ԳՇ-ի հայտարարությանը։