ԵՐԵՎԱՆ, 27 նոյեմբերի- Sputnik. Հայաստանին սպասում է համեմատաբար տաք ձմեռ, ուրբաթ լրագրողներին ասաց ՀՀ ՏԿԱԻՆ Հիդրոմետ ծառայության օդերևութաբանության կենտրոնի պետի տեղակալ Գագիկ Սուրենյանը։
Նա հայտնեց, որ դեկտեմբերի միջին ջերմաստիճանը նորմայից բարձր կլինի մեկ աստիճանով, տեղումները նույնպես կգերազանցեն նախորդ տարիների ցուցանիշները։
Դեկտեմբերի 1-ին Երևանում ջերաստիճանը կնվազի և կկազմի 9-11 աստիճան։ Առաջիկա հինգ օրերին տեղումներ չեն սպասվում։
Առաջին տասնօրյակում Երևանում ջերմաստիճանը ցերեկային ժամերին կլինի 8-10 աստիճան տաքություն, երկրորդ տասնօրյակում`ցածրադիր մասերում գիշերային ժամերին` —12-15 աստիճան, բարձրադիր մասերում`-10-15։
Շիրակի, Կոտայքի, Գեղարքունիքի, Արագածոտնի և Վայոց Ձորի մարզերում դեկտեմբերի առաջին տասն օրերին ջերմաստիճանը կբարձրանա և կկազմի 4-7 աստիճան տաքություն։ Դեկտեմբերի երկրորդ տասնօրյակում գիշերային ժամերին ջերմաստիճանը կկազմի —18-23 աստիճան։ Այդ շրջանում ամենացուրտ շրջանը կլինի Սյունիքը։ Այնտեղ ջերմաստիճանը կկազմի —7-17 աստիճան։
Սուրենյանը հաղորդեց, որ Հայաստանում ամենացուրտ ձմեռները գրանցվել են 1932, 33, 41, 48, 53, 70, 82, 84, 87 և 2002 թվականներին։
2015թ.-ի ընթացքում գրանցվել է չորս ռեկորդ. ձմեռը հազարամյակի ամենատաք ձմեռն է եղել, ամառը` ամենաշոգը, հոկտեմբերին գրանցվել է տեղումների ամենամեծ քանակը։ Չորրորդ ռեկորդը դարձել են ուժեղ քամիները, որոնք գրանցվել են ողջ հանրապետությունում, սակայն ամենամեծ վնասը պատճառել են Վանաձորին։
